საქართველოს თავდაცვის მინისტრ ირაკლი ალასანიას განცხადებით, "ჩრდილოატლანტიკურ ალიასნში გასაწევრიანებლად საქართველოს ხელისუფლების სწრაფვას რუსეთის მხრიდან გაკეთებული ვერანაირი განცხადება წინ ვერ დაუდგება".
როგორც ალასანიამ რუსეთის ფედერაციის პრემიერ-მინისტრ დიმიტრი მედვედევის მიერ ტელეკომპანია "რუსთავი 2"-სთვის მიცმულ ინტერვიუში საქართველოს საგარეო პოლიტიკური კურსის თაობაზე გაკეთებული განცხადებების კომენტირებისას აღნიშნა, "დიმიტრი მედვედევს თავის განცხადებებში ახალი არაფერი უთქვამს და რუსეთის რიტორიკა იგივეა"
"ვიზიარებ პოზიციას, რომ ჩვენ უნდა გავაგრძელოთ ყველა მცდელობა, რომ მოხდეს ურთიერთობების ნორმალიზება. პირველ რიგში, სავაჭრო ურთიერთობების გაღრმავება. რაც შეეხება პოლიტიკურ ასპექტს, ჩვენი კონფლიქტი ალბათ ძალიან მტკვნეულად კიდევ დიდხანს დარჩება ორ ქვეყანას შორის უდიდეს პრობლემად, ვიდრე რუსეთის ფედერაცია არ მივა დასკვნამდე, რომ მათ მოუწევთ აღიარება საქართველოს ტერიტორიული მთლიანობის და სარკოზისთან მიღწეული შეთანხმების ბოლომდე შესრულება, ვიდრე არ დატოვებს საქართველოს ტერიტორიას საოკუპაციო ჯარები. თავდაცვის სამინისტრო ვაგრძელებთ განვითარებას, ნატოს სტანდარტებთან მიახლოებას, აქედან გამომდინარე, ვერანაირი განცხადება ჩვენს სწრაფვას და პრაქტიკულ დაახლოებას ნატოსთან და საბოლო ჯამში გაწევრიანებას, წინ ვერ დაუდგება. ჩემი აზრით, ზედმეტი ემოციური აჟიოტაჟი გამოიწვია მედვედევის ამ განცხადებებმა. მასში სიახლე მე ვერაფერი ვერ ამოვიკითხე. დიპლომატიური ბრძოლის ხაზი გადიოდა გაეროში, სადაც მე ვმუშაობდი ხუთი წლის წინ. ზუსტად ასეთივე რიტორიკა იყო მაშინ, უნდოდათ საქართველოს საერთაშორისო იზოლაციაში მოქცევა, აღმოჩნდა, რომ რუსეთი აღმოჩნდა საერთაშორისო იზოლაციაში, ჩაუვარდათ აღიარების პოლიტიკა. ეს ნიშნავს იმას, რომ მსოფლიო თანამეგობრობა გვერდში უდგას საქართველოს და იზიარებს ჩვენს პოზიციას და არა - რუსეთისას. აქედან გამომდინარე, სამწუხაროდ, სიახლე ამ განცხადებებში, მათ პოლიტიკაში ჯერჯერობით არ არსებობს. აუცილებელია გაგრძლედეს ყველა მცდელობა, რომ მოხდეს რუსეთსა და საქართველოს შორის ურთიერთობის ნორმალიზება.,"- განაცხადა ირაკლი ალასანიამ.