თბილისის მერის პასუხი თინა ხიდაშელს. როგორც გიგი უგულავას მიერ გავრცელებულ განცხადებაშია აღნიშნული, თინა ხიდაშელს ცილისწამების უცნაური ფორმა აქვს არჩეული და მისი რიტორიკა საკრებულოს თავმჯდომარის რიტორიკას წააგავს.
„ქალბატონ თინას ცილისწამების უცნაური ფორმა აქვს არჩეული, ჯერ ადამიანს ბრალს სდებს და იქვე ამბობს, რომ ფაქტებს ეხლა სწავლობს და გვარებს მოგვიანებით დაასახელებს. რა მნიშვნელობა აქვს ქაბატონო თინა, ბრალი ხომ დასდეთ, ახლა სხვამ იდარდოს და ამტკიცოს საკუთარი უდანაშაულობა. მინდა მარტივად და ლაკონურად გითხრათ: თქვენ იტყუებით და თან ურცხვად, ეს კი მხოლოდ თქვენი პრობლემაა. საზოგადოებამ იხილა, რომ გუშინ მე აბსოლუტურად კონსტრუქციულად, თანამშრომლობის რეჟიმში, ყოველგვარი ნიშნის მოგების გარეშე, დავაყენე საკითხები და საკრებულოს უმრავლესობას შევთავაზე მსჯელობა პრობლემის მოსაგვარებლად, პასუხად კი ვიღებთ ღვარძლსა და ცილისწამებას. ჩემთვის ორმაგად გასაკვირია, რომ ქალბატონი თინა ხიდაშელისა და ირაკლი შიხიაშვილის რიტორიკა გაჭრილი ვაშლივით ჰგავს ერთმანეთს. გასაკვირია რა მოხდა და ასე რამ დაამსგავსა ისინი ერთმანეთს"- განაცხადა უგულავამ.
შეგახსენებთ, რომ თბილისის მერია ცენტრალურ მთავრობას დედაქალაქის მასშტაბით, 25 ახალი საბავშვო ბაღის მშენებლობის გეგმას სთავაზობს. "55 მილიონი ლარის ღირებულების პროექტის განხორციელება აუცილებლობა მას შემდეგ დადგა, რაც სახელმწიფო ბაღებში სწავლება უფასო გახდა და მსურველთა რაოდენობა გაიზარდა", - აცხადებენ მერიაში.
საპასუხოდ დღეს ბრიფინგი გამართა საკრებულოს თავმჯდომარემ ირაკლი შიხიაშვილმა და განაცხადა, რომ ბაგა-ბაღების მშენებლობასთან დაკავშირებით უგულავას მიერ გაჟღერებული წინადადება საკრებულოს ინიციატივა იყო.