ექსპერტ სოსო ცისკარიშვილის განცხადებით, "2008 წლის აგვისტოს ომზე საუბრის ყველაზე ნაკლები მორალური უფლება რუსეთის ფედერაციის პრემიერ-მინისტრ დიმიტრი მედვედევს აქვს".
როგორც ცისკარიშვილმა დიმიტრი მედვედევის მიერ ტელეკომპანია "რუსთავი 2"-სთვის მიცემულ ინტერვიუში გაკეთებული განცხადებების კომენტირებისას აღნიშნა, "რუსეთის მაშინდელი პრეზიდენტის მიერ დღეს იმის თქმა, რომ მან არაფერი იცოდა და მოვლენები სწრაფად განვითარდა, არადამაჯერებელია და ამაზრზენია".
"აგვისტოს ომზე საუბრის ყველაზე ნაკლები მორალური უფლება დიმიტრი მედვედევს აქვს, რომელიც მაში რუსეთის ფედერაციის შეიარაღებული ძალების უმაღლესი მთავარსარდალი გახლდათ. ძალიან თბილ და კეთილ ადამიანად სურდა თავის წარმოჩენა, მაგრამ ფაქტები სხვაზე მიგვანიშნებს. ომზე მისი საუბარი არა თუ არადამაჯერებელი, არამედ, ცოტა ამაზრზენიც არის, რადგან მან ყველაფერი კარგად იცოდა რაშიც იყო საქმე. მან მოიგონა 2 000 ცხედარი 8 აგვისტოს დილით ცხინვალში და შემდგომი ყველა ქმედება არადამაჯერებელია, რადგან თავად ის არასოდეს ყოფილა და ვერც იქნება დამოუკიდებელი პოლიტიკოსი,"- განაცხადა სოსო ცისკარშვილმა.
