საპარლამენტო უმცირესობის წევრის თინათინ ბოკუჩავას განცხადებით, "რუსეთის ფედერაციის პრემიერმინისტრ დიმიტრი მედვედევის განცხადებები მისი მხრიდან მართლაც გასაოცარი ცინიზმის გამოვლენა იყო".
ამის შესახებ ბოკუჩავამ დღეს უმაღლეს საკანონმდებლო ორგანოში დიმიტრი მედვედევის მიერ ტელეკომპანია "რუსთავი 2"-ისთვის მიცემულ ინტერვიუში გაკეთებული განცხადებების კომენტირებისას ისაუბრა.
"ეს ადამიანი კიდევ ერთხელ იმეორებს, რომ რუსეთი მიიღებდა იგივე გადაწყვეტილებას, ის ამართლებს მაშინ საქართველოს ტერიტორიაზე შემოჭრას, საქართველოს ოკუპაციას და ეთნოწმენდას. ეს არის მართლაც გასაოცარი ცინიზმის გამოვლენა მისი მხრიდან. ჩემთვის, როგორც ქართველისთვის, ძალიან მტკივნეულია, რომ ის დღეს კიდევ ერთხელ იმეორებს ამას,"- განაცხადა თინათინ ბოკუჩავამ.
ცნობისთვის, რუსეთის ფედერაციის პრემიერ-მინისტრ დიმიტრი მედვედევის განცხადებით, დღევანდელი გადმოსახედიდან, სიტუაციის ანალიზის მიუხედავდ, იგი 2008 წლის აგვისტოში მიღებულ გადაწყვეტილებას არ შეცვლიდა. ამის შესახებ მედვედევმა ტელეკომპანია "რუსთავი"-ის ჟურნალისტ ნინო შუბლაძისთვის მიცემულ ექსკლუზიურ ინტერვიუში ისაუბრა.
ჟუნალისტის კითხვაზე "მომხდარიდან 5 წლის შემდეგ, ამ გადასხედიდან, როდესაც სიტუაიციის ანალიზი გაკეთებულია, ფიქრობს თუ არა, რომ 2008 წლის აგვისტოში მის მიერ მიღებული ყველა გადაწყვეტილება სწორი იყო", მედვედევმა დადებითად უპასუხა.
"სამწუხაროდ, ის, რაც მოხდა, მოხდა. ხოლო, თუ ჩემი შეფასების შესახებ ვილაპარაკებთ, ეს რა თქმა უნდა, მას მერე არ შეცვლილა. მიმაჩნია, რომ იძულებული ვიყავით ამგვარად გვეპასუხა შესაბამის აგრესიულ ქმედებებზე. ანალოგიურად მოვიქცეოდი თუ არა ასეთ სიტუაციაში? - ჩემი პასუხია - დიახ. მიუხედავად იმისა, რომ ეს უმძიმესი გადაწყვეტილებაა, რომლის მიღებაც მომიხდა როგორც პრეზიდენტს, როგორც რუსეთის ფედერაციის შეიარაღებული ძალების მთავარსარდალს. ზუსტად ასევე მოვიქცეოდი,"- განაცხადა დიმიტრი მედვედევმა.