საქართველოს უმაღლესი საკანონმდებლო ორგანოს ვიცე-სპიკერ მანანა კობახიძის განცხადებით, "მიუხედავად რუსეთის პრემიერ-მინისტრის პოზიციისა საქართველოს ხელისუფლება არსებულ საგარეო პოლიტიკურ კურსს არ შეცვლის".
მისი თქმით, "პრემიერ-მინისტრი ბიძინა ივანიშვილი არის პრაგმატულიც, ჭკვიანიც და ქართველი ხალხის წინაშე აღებულ პასუხისმგებლობას ბოლომდე შეასრულებს".
"რუსეთისგან რაიმე უკეთესობას მე პირადად არ მოველოდი, მაგრამ ეს არის პოლიტიკა. ჩვენ ჩვენი მიზნებისკენ სწრაფვა უნდა გავაგრძელოთ, ჩვენი სტრატეგიული ამოცანაა ჩრდილოატლანტიკურ ალიანსში გაწევრიანება და ევროინტეგრაცია და ეს არის ჩვენი უსაფრთხოებისა და თავდაცვისთვის ერთ-ერთი აუცილებელი და მნიშვნელოვანი ნაბიჯი და მიუხედავად იმისა, დღეს რა პოზიციაზეა თუნდაც იგივე რუსეთის პემიერი, ეს არ ნიშნავს, რომ ჩვენ რაიმეს გადავხედავთ ამ მიმართულებით. ჩვენ გავაგრძელებთ ჩვენს საგარეო პოლიტიკურ კურსს. ბიძინა ივანიშვილი არის პრაგმათულიც, არის საკმაოდ ჭკვიანიც, ნიჭიერიც და ის თავის ფუნქციას და თავის მისიას შეასრულებს, პასუხისმგებლობას რაც აიღო ჩვენი საზოგადოების წინაშე. ამას თუ მედვედევი ამჩნევს და აღიარებს, ამაში განსაკუთრებული არაფერი არ არის,"- განაცხადა მანანა კობახიძემ.