საპარლამენტო უმრავლესობის წევრის, უმაღლესი საკანონმდებლო ორგანოს ვიცე-სპიკერ მანანა კობახიძის განცხადებით, ”თუ ”ქართული ოცნების” საპრეზიდენტო კანდიდატ გიორგი მარგველაშვილის მონაწილეობით გამართული რომელიმე ღონისძიება ბიუჯეტიდან იყო დაფინანსებული და იქ საარჩევნო აგიტაცია წარმოებდა, ცხადია, ამას გარკვევა სჭირდება”.

ამის შესახებ კობახიძემ დღეს არასამთავრობო ორგანიზაცია ”საერთაშორისო გამჭვირვალობა - საქართველოს” მიერ გიორგი მარგველაშვილისადმი გავრცელებული მიმართვის კომენტირებისას განაცხადა, რომლის თანახმად, ორგანიზაცია მმართველი გუნდის საპრეზიდენტო კანდიდატს წინასაარჩევნო პერიოდში ადმინისტრაცული რესურსის გამოყენებისგან თავშეკავებისკენ მოუწოდებს. 

”რა თქმა უნდა ბიუჯეტის თანხების ხარჯვა საარჩევნო მიზნებთან დაკავშირებული არ უნდა იყოს და ჩვენ მკაცრად ჩავდეთ ეს საარჩევნო კოდექსში, ”პოლიტიკური გაერთიანებების შესახებ” კანონში. ანუ, არ შეიძლება ადმინისტრაციული რესურსის გამოყენება და თუ ამასთან გვაქვს საქმე, ეს გასარკვევია. თუ მარგველაშვილის მონაწილეობით გამართული რომელიმე ღონისძიება ბიუჯეტიდან იყო დაფინანსებული და იქ საარჩევნო აგიტაცია წარმოებდა, ცხადია, ამას გარკვევა სჭირდება,”- განაცხადა მანანა კობახიძემ.

არასამთავრობო ორგანიზაცია ”საერთაშორისო გამჭვირვალობა - საქართველოს” მიერ გავრცელებულ განცხადებას საპარლამენტო უმცირესობის წევრი სერგო რატიანიც გამოეხმაურა და აღნიშნა, რომ ”არასამთავრობო ორგანიზაციის მიერ  მსგავსი შინაარსის ინფორმაციის გაავრცელება მარგველაშვილის მიერ ადმინისტრაციული რესურსის გამოყენებაზე მეტყველებს”.

”მიუხედავად განათლების მინისტრის თანამდებობის დატოვებისა, გიორგი მარგველაშვილს არ მოაკლდება და არ მოაკლდა ადმინისტრაციული რესურსი და ”საერთაშორისო გამჭვირვალობა - საქართველოს” მიერ დღეს გავრცელებული განცხადებაც სწორედ ამაზე მეტყველებს,”- განაცხადა სერგო რატიანმა.

ცნობისთვის, არასამთავრობო ორგანიზაცია "საერთაშორისო გამჭვირვალობა - საქრთველომ" კოალიცია "ქართული ოცნების" საპრეზიდენტო კანდიდატ გიორგი მარგველაშვილს წინასაარჩევნო კამპანიისას ადმინისტრაციული რესურსების გამოყენებისგან თავშეკავებისკენ მოუწოდა.

აღნიშნულთან დაკავშირებით, ორგანიზაცია "საერთაშორისო გამჭვირვალობა -საქართველო" სახელმწიფო უწყებების მიერ გამართულ სხვადასხვა ტიპის ღონისძიებებში გიორგი მარგველაშვილის მონაწილეობის და დასწრების ფაქტებს ასახელებს და მიიჩნევს, რომ "მსგავსი ტიპის ღონისძიებებზე პრეზიდენტობის კანდიდატის დასწრება კანონდარღვევებს წარმოშობს, რადგან პარლამენტის მიერ სამი მოსმენით უკვე მიღებულ საარჩევნო კოდექსში ცვლილების თანახმად, სახელმწიფო ბიუჯეტიდან დაფინანსებულ ღონისძიებებზე აგიტაცია ადმინისტრაციული რესურსების გამოყენებად ითვლება".

დღესვე კოალიცია "ქართული ოცნების" საპრეზიდენტო კანდიდატ გიორგი მარგველაშვილის პრეს-სამსახური არასამთავრობო ორგანიზაცია "საერთაშორისო გამჭვრვალობა - საქართველოს" მიერ  გავრცელებულ გამოეხმაურა და აღნიშნა, რომ ორგანიზაციის ინტერესი - ქვეყანაში სამართლიანი, გამჭვირვალე და თავისუფალი საპრეზიდენტო არჩევნები ჩატარდეს, მისასალმებელია.

როგორც მარგველაშვილის პრესსამსახურში განმარტავენ, "კოალიცია „ქართული ოცნებისათვის" მნიშვნელოვანია არასამთავრობო სექტორთან თანამშრომლობაც".

"აღსანიშნავია, რომ დღეს ჩვენ ვსაუბრობთ არა კანონდარღვევებზე, რასაც წინა ხელისუფლების დროს ჰქონდა ადგილი, არამედ მაღალი პოლიტიკური სტანდარტების დამკვიდრებაზე. მიუხედავად იმისა, რომ საქართველოს კანონმდებლობა განათლებისა და მეცნიერების მინისტრს აძლევს საშუალებას, იმავდროულად იყოს პრეზიდენტობის კანდიდატი, გიორგი მარგველაშვილმა 2013 წლის 16 ივლისს აღნიშნული თანამდებობა დატოვა.

„კანონი მაძლევს იმის უფლებას, რომ დავრჩე თანამდებობაზე, მაგრამ ჩვენ სწორედ იმიტომ მოვედით ხელისუფლებაში, იმიტომ გვაქვს პრეტენზია ქვეყნის მართვის, რომ ახალი სტანდარტები და პოლიტიკური კულტურა დავნერგოთ." - განაცხადა გიორგი მარგველაშვილმა.

გარდა, ამისა პრეზიდენტობის კანდიდატმა არაერთხელ აღნიშნა, რომ ყველა კანდიდატს თანაბარ პირობებში მოუწევს საარჩევნო კამპანიის წარმოება.

კოალიცია „ქართული ოცნება" აცხადებს, რომ დემოკრატიული და სამართლიანი არჩევნების ჩატარება ქვეყნისათვის ძალზედ მნიშვნელოვანია. ქვეყნის პრემიერ-მინისტრმა, ბიძინა ივანიშვილმა არაერთხელ განაცხადა, რომ არსებული ხელისუფლება, განსხვავებით წინამორბედისგან, არანაირი პირდაპირი თუ ირიბი გზით არ ეცდება წინასაარჩევნო პერიოდში ადმინისტრაციული რესურსის გამოყენებას. ქვეყნის პრემიერ-მინისტრის, ბიძინა ივანიშვილის განმარტებით - „ჩვენ ყველაფერს გავაკეთებთ, რომ ყველა მონაწილეს, ყველა კანდიდატს ჰქონდეს თანაბარი უფლებები, არცერთ შემთხვევაში არ იქნება გამოყენებული სახელმწიფო რესურსები." სწორედ, ზემოაღნიშნული სტანდარტების დამკვიდრებას ემსახურება საქართველოს პარლამენტის მიერ მიღებული ცვლილებები საარჩევნო კანონმდებლობაში. კოალიცია „ქართული ოცნება" წარმოადგენს იმ ძალას, რომელსაც საქართველოს მოსახლეობის უდიდესმა ნაწილმა გამოუცხადა მხარდაჭერა. საარჩევნო კამპანია არ გასცდება კანონით დადგენილ თუ პოლიტიკური სტანდარტის ზღვარს, რომლის აღსრულებისთვისაც კოალიცია იბრძოდა და იბრძვის საქართველოს მოსახლეობასთან ერთად,"- ნათქვამია გიორგი მარგველაშვილის პრეს-სამსახურის მიერ გავრცელებულ განცხადებაში.