საქართველოს სასჯელაღსრულების, პრობაციის და იურიდიული დახმარების საკითხთა მინისტრ სოზარ სუბარის განცხადებით, "შინაგან საქმეთა და თავდაცვის ექს-მინისტრმა, სასჯელაღსრულების სამინისტროს ყოფილმა ხელმძღვანელმა ბაჩო ახალაიამ გეგუთის საპყრობილეში გარდაცვლილ პატიმარ ლევან კორტავას საქმესთან დაკავშირებით გაკეთებული განცხადებით თავისი ქმედებების აღიარება მოახდინა".
სუბარის თქმით, "გასულ წლებში ციხის ადმინისტრაცია და ე.წ. "კანონიერი ქურდები" შეთანხმებულად მოქმედებდნენ".
"ბაჩო ახალაიამ ძალიან საინტერესო განცხადება გააკეთა, პრაქტიკულად ეს იყო აღიარება და ლუსტრაცია თავისი ქმედების, როცა მან თქვა, რომ ციხეში "მაყურებლები" იყვნენ და მოქმედებდნენ მხოლოდ ადმინისტრაციასთან შეთანხმებით. აი, ეს არის ის, რასაც ჩვენ ვებრძვით, ეს არის ის რეალობა, რაც დაგვხდვა, რასაც ჩვენ მოვუღებთ ბოლოს, ოღონდ, ამას სჭირდება დრო. რაც შეეხება იმას, იყვნენ თუ არა "მაყურებლები", ახალაიამ თვითონ აღიარა, რომ იყვნენ. ამაზე მე მაქვს დაწერილი დასკვნა, როცა სახალხო დამცველი ვიყავი და იქ აღწერილია როგორ მოქმედებდნენ ადმინისტრაცია და "ქურდები" ერთად, რაც ახალაიამ თავისი განცხადებით დაადასტურა", - განაცხადა სოზარ სუბარმა.
შეგახსენებთ, შინაგან საქმეთა და თავდაცვის ექს-მინისტრმა, სასჯელაღსრულების სამინისტროს ყოფილმა ხელმძღვანელმა ბაჩო ახალაიამ გეგუთის ციხეში გარდაცვლილი პატიმრის ლევან კორტავას საქმეზე განცხადება გააკეთა და აღნიშნა, რომ "საპატიმრო დაწესებულების დირექტორი მალხაზ სინაურიძე იმიტომ არ დააკავეს, რომ იგი ე.წ ციხის ბუნტის საქმეში მის წინააღმდეგ ერთადერთი მოწმეა".
"სრული პასუხისმგებლობით ვაცხადებ, რომ სასჯელაღსრულების სისტემის არცერთ დაწესებულებაში ციხის დირექტორის გარეშე მაყურებლები არ არსებობენ. მაშინ როდესაც, სასჯელაღსრულების მე-14 დაწესებულებაში მაყურებლებისა და ადმინისტრაციის დავალებით ლევან კორტავა მოკლეს, აღნიშნული ციხის დირექტორი მალხაზ სინაურიძე იყო. ერთადეთი მიზეზი, რის გამოც დღეს ეს ადამიანი არ არის პასუხისგებაში მიცემული არის ის, რომ იგი არის ერთადერთი მოწმე ჩემს წინააღმდეგ ე.წ. ქურდების ანუ ბუნტის საქმეში. მნიშვნელოვანია, რომ სინაურიძემ ბუნტის საქმეში პროკურატურის კარნახით არაერთხელ შეცვალა ჩვენება და სწორედ ეს გახდა გარანტი იმისა, რომ მის მიმართ არ განხორციელდა სისხლისსამართლებრივი დევნა. სამწუხაროდ, მაყურებლები ციხეებში დღეს ნამდვილად არის სისტემური პრობლემა, რაც მომავალში კვლავ გამოიწვევს არაერთ მძიმე შედეგს", - განაცხადა ბაჩო ახალაიამ.