საქართველოს ეკონომიკის მინისტრ გიორგი კვირიკაშვილის განცხადებით, იგი მზადაა საპარლამენტო და არასაპარლამენტო ოპოზიციასთან ითანამშრომლოს და და ქვეყნის ეკონომიკაში მიმდინარე პროცესები განიხილოს. ამის შესახებ კვირიკაშვილმა "ნაციონალური მოძრაობის" საპრეზიდენტო კანდიდატ დავით ბაქრაძის იმ განცხადების კმენტირებისას ისაუბრა, რომლის თანახმად, საპარლამენტო ოპოზიციის ლიდერმა ქვეყნის ეკონომიკურ გუნდს თანამშრომლობა და გამოცდილების გაზიარება შესთავაზა.
"ჩვენ ვართ პატარა ქვეყანა და მთავრობამ უნდა ილაპარაკოს არა მხოლოდ საპარლამენტო, არამედ არასაპარლამენტო ოპოზიციასთან და ყველასთან, ვისაც ექნება ინტერესი და შესაძლებლობა დადებითი წვლილი შეიტანოს ეკონომიკის განვითარებაში. ჩვენ არ გვაქვს არავისთან შეხვედრის პრობლემა. კიდევ ერთხელ ვამბობ, რომ შეხვდებით საპარლამენტო და არასაპარლამენტო ოპოზიციასაც. თუმცა ჩემს გაკვირვებას იწვევს რომ, ის საკითხები, რომელთა ინიციატივითაც ოპოზიცია გამოდის, მათი მოგვარების შესაძლებლობა ჰქონდათ და ამ საკითხების დაძვრის საშუალება რამდენიმე წლის წინა არ დადგა,"- განაცხადა გიორგი კვირიკაშვილმა.
შეგახსენებთ, რომ "ნაციონალური მოძრაობის" საპრეზიდენტო კანდიდატმა დავით ბაქრაძემ მოსახლეობის ეკონომიკური მდგომარეობის გაუმჯობესების კუთხით მუშაობისთვის მთავრობასა და პრემიერ-მინისტრს "ნაციონალურ მოძრაობაში" არსებული ადამიანური რესურსის გამოყენება და თანამშრომლობა შესთავაზა.
"ბოლო თვეების განმავლობაში, საქართველოს ეკონომიკა ხასიათდება მუდმივი კლებით: თუ ამ წლის პირველი თვეები იყო კლება, მაისში ეს კლება ჩამოვიდა ნულოვან ზრდაზე, ხოლო ივნისში კიდევ უარესი - გადაიზარდა მინუსში, ანუ საქართველოში ეკონომიკამ დაიწყო, რეალურად დაკლება. უნდა გვესმოდეს, რომ ეს ნიშნავს დაკარგულ სამუშაო ადგილებს, ეს ნიშნავს იმას, რომ ამ ტენდენციის შემთხვევაში, საფრთხის ქვეშ დადგება სოციალური ვალდებულებების შესრულება მომავალი რამდენიმე თვის შემდეგ და ამ ქვეყანაში ადამიანები არათუ უკეთ ვერ იცხოვრებენ, არამედ პირიქით, ძალიან ბევრი ოჯახი იცხოვრებს უარესად იმიტომ, რომ გაიზრდება უმუშევრობა, არ შეიქმნება სამუშაო ადგილები და საფრთხის ქვეშ დადგება ყველა ის სოციალური დაპირება, რომელიც ასე სჭირდება ჩვენს ხალხს, ამიტომ ამ ფონზემე მე მიმაჩნია, რომ მთავრობის ერთ-ერთი მთავარი პრიორიტეტი ქვეყანაში უნდა იყოს ეკონომიკის გაჯანსაღება, რაც პირდაპირ ნიშნავს ხალხის უკეთეს ცხოვრებას. სწორედ ამიტომ, მე მინდა შევთავაზო მთავრობასა და პრემიერ ბიძინა ივანიშვილს: ჩვენს გუნდში არიან კვალიფიციური ეკონომისტები, არიან ადამიანები, რომლებიც წინა წლების განმავლობაში უზრუნველყოფდნენ საქართველოს ეკონომიკის გაზრდას წელიწადში 7-8%-ით. ჩვენ მზად ვართ, გვერდზე გადავდოთ პოლიტიკა, პოლიტიკური განსხვავებები და ერთად ვიმსჯელოთ იმაზე, თუ როგორ გავაუმჯობესოთ ჩვენი მოსახლეობის ცხოვრება. სწორედ ამიტომ, მე ვთავაზობ პრემიერ-მინისტრს შეხვედრას ეკონომიკურ საკითხზე და ამ შეხვედრის ძირითადი ამოცანა უნდა იყოს, ერთად ვისმჯელოთ, თუ როგორ გამოვიყვანოთ საქართველოს ეკონომიკა იმ კრიზისიდან, რომელშიც ის უკვე შევიდა. ჩვენი ეკონომიკური ხედვის ნაწილს საზოგადოება უკვე გაეცნო - გუშინ გამოქვეყნდა ძალიან კვალიფიციური წერილი ზურაბ ჯაფარიძის, რომელიც ჩვენი გუნდის წევრია. მე შემიძლია, საჯაროდ დავაფიქსირო რამდენიმე შეთავაზება, რომელზეც მზად ვარ, ვიმსჯელო პრემიერ - მინისტრთან შეხვედრაზე,"- განაცხადა დავით ბაქრაძემ.