ჯორჯ ვაშინგტონის უნივერსიტეტის ევროპის, რუსეთისა და ევრაზიის კვლევების ინსტიტუტის ასოცირებული დირექტორის, პროფესორ კორი ველტის განცხადებით, "მთავარ პროკურატურას საქართველოს შინაგან საქმეთა ყოფილი მინისტრისა და ექს-პრემიერ ვანო მერაბიშვილისთვის წამებისა და უკანონოდ თვალთვალის ბრალდება რომ წაეყენებინა, ვაშინგტონში მის საქმიანობას უფრო მეტი სიმპატიით მოეკიდებოდნენ".
როგორც კორი ველტიმ „ამერიკის ხმისთვის" მიცემულ ინტერვიუში განაცხადა, „მთავრობას უჭირს დამტკიცება, რომ დაპატიმრებები პოლიტიკურად მოტივირებული არა, რადგან, გაცილებით მნიშვნელოვანი ბრალდებების წაყენება შეიძლებოდა"
„მთავრობას ძალიან უჭირს იმის დამტკიცება, რომ ეს დაპატიმრებები პოლიტიკურად მოტივირებული არ არის იმის გამო, რომ წაყენებული ბრალდებები გაცილებით უმნიშვნელოა იმასთან შედარებით, თუ რისი წაყენება შეიძლებოდა. ძალიან ძნელი იქნება მთავრობისთვის ვინმეს იმაში დარწმუნება, რომ პროცესი სამართლიანია, როცა ისეთ ფიგურას როგორიც მერაბიშვილია სასამართლომდე წინასწარი პატიმრობა აქვს შეფარდებული. პროკურატურას მის წინააღმდეგ წამებისა და უკანონოდ თვალთვალის ბრალდება რომ წაეყენებინა, იმ ბრალდების ნაცვლად, რომელიც მას ახლა აქვს წარდგენილი, პროკურატურის საქმიანობას ვაშინგტონში უფრო მეტი სიმპატიით მოეკიდებოდნენ. ერთი, რაც შემიძლია ვიფიქრო, არის ის, რომ მათ არ აქვთ სამხილი, რომელიც სასამართლოს გამოცდას გაუძლებს. უკვე გასამართლდა რამდენიმე დაბალი რანგის ადამიანი, მაგრამ პროკურატურას სურს აღმოაჩინოს ისეთი სამხილი, რომელიც ამ ადამიანებს, და შესაძლოა თავად პრეზიდენტსაც ამ დანაშაულთან პირდაპირ დააკავშირებს. შესაძლოა ისინი ელოდებიან პრეზიდენტის გადადგომას, ან ცდილობენ იპოვონ სამხილი, ეს კი კანონის გაუმართაობაზე მეტყველებს და სწორედ ამასთან დაკავშირებით გამოხატავენ შეშფოთებას აშშ-ში, რადგან პროცესს იგივე მნიშვნელობა აქვს, რაც დამნაშავის დასჯას. თუ პროკურატურას არ აქვს შესაბამისი სამხილი, მაშინ შესაძლოა უპრიანი იყოს, ზოგიერთი საქმის განხილვის მოხსნა",- განაცხადა კორი ველტიმ.
