,,დემოკრატიული მოძრაობის" ლიდერი და საპრეზიდენტო კანდიდატი ნინო ბურჯანაძე ადვოკატთა ასოციაციის თავმჯდომარის ზაზა ხატიაშვილის მიწვევით ასოციაციის წევრ ადვოკატებს შეხვდა. აღნიშნულთან დაკავშირებით პარტია განცხადებას ავრცელებს, რომელსაც ,,ჯი-ეიჩ-ენი" უცვლელად გთავაზობთ: „ადვოკატთა ასოციაციის" ოფისში გაიმართა შეხვედრა პრეზიდენტობის კანდიდატ ნინო ბურჯანაძესა და ადვოკატთა ასოციაციის წევრებს შორის. ნინო ბურჯანაძე ზაზა ხატიაშვილის მიმართვას გამოეხმაურა, სადაც იგი პრეზიდენტობის კანდიდატებს მიმართავს დააფიქსირონ საკუთარი პოზიცია და მხარი დაუჭირონ ადვოკატთა ასოციაციის თავმჯდომარის პოზიციას - მოწმედ დაბარებული პირი დაიკითხოს პირდაპირ სასამართლოში და არ მოხდეს სისხლის სამართლის საპროცესო კოდექსის ამოქმედების ვადის გადაწევა 2014 წლის დეკემბრამდე, მოწმედ დასაკითხ პირთან მიმართებაში. უნდა აღინიშნოს, რომ ნინო ბურჯანაძე გახლავთ პირველი პოლიტიკოსი, რომელიც მიწვეულ იქნა ადვოკატთა ასოციაციაში. შეხვედრამ საქმიან და მეგობრულ ვითარებაში ჩაიარა. პრეზიდენტობის კანდიდატმა წარმოადგინა საკუთარი ხედვები ქვეყანაში სამართლიანობის აღდგენისა და დამკვიდრების, სამართლიანი სასამართლოს ჩამოყალიბებისა და ადვოკატთა უფლებების დაცვის კუთხით მისი პრეზიდენტად არჩევის შემთხვევაში, უპასუხა დამსწრე საზოგადოების შეკითხვებს.

შეხვედრის დასრულების შემდეგ ნინო ბურჯანაძემ ჟურნალისტებთან კომენტარი გააკეთა: „ჩემთვის ძალიან მნიშვნელოვანია დღეს ადვოკატებთან შეხვედრა. მინდა ადვოკატთა ასოციაციის პრეზიდენტს ბატონ ზაზა ხატიაშვილსა და ყველა იმ ადვოკატს, ვინც გამოთქვა სურვილი ამ შეხვედრაში მონაწილეობის მიღებისა, მადლობა გადავუხადო. მინდა მადლობა გადავუხადო ადვოკატებს იმ საქმიანობისთვის, რომელსაც ისინი ახორციელებდნენ სააკაშვილის რეჟიმის პირობებში, როდესაც საერთაშორისო ადვოკატთა ორგანიზაციამ ადვოკატთა საქმიანობა საქართველოში რისკ-ფაქტორად შეაფასა. იმ პერიოდში, უკანონოდ დაკავებული ადამიანებისათვის ერთადერთი შველა იყო ადვოკატებთან საუბარი, მათთან ურთიერთობა და ხშირ შემთხვევებში ადვოკატები იმდენად მძიმე მდგომარეობაში იყვნენ, რომ ისინი ლამის ფსიქოთერაპევტის ფუნქციას ასრულებდნენ ხოლმე. შეზღუდული იყო ადვოკატთა უფლებები, მაგრამ ადვოკატები ბრძოლას აგრძელებდნენ. საგანგაშო იყო ის ფაქტი, რომ 157 ადვოკატი იყო დაკავებული და დღეს ყველაფერი უნდა გაკეთდეს საქართველოში იმისათვის, რომ ადვოკატთა უფლებები აღარ შეილახოს. ძალიან მნიშვნელოვანი იყო ის მიმართვა, რომელიც ბატონმა ზაზა ხატიაშვილმა გააკეთა პრეზიდენტობის ყველა კანდიდატთან, რადგან ყველამ უნდა გაითვალისწინოს, რომ ადამიანებს უნდა იცავდეს კანონი და არა რომელიმე კონკრეტული თანამდებობის პირი. კანონმა კი ადვოკატებს უნდა შეუქმნას აბსოლუტურად ისეთივე პირობები და უფლებები, როგორიც აქვს ბრალდების მხარეს", _განაცხადა ბურჯანაძემ.