საქართველოში აშშ-ის საელჩო Wall Street Journal-ის სტატიასთან დაკავშირებით განცხადებას ავრცელებს.
„შეერთებული შტატების მთავრობა განსაკუთრებულ ყურადღებას უთმობს ირანის მიერ სანქციებისათვის თავის არიდების ყველა მცდელობის აღკვეთას, მათ შორის საქართველოში შესაძლო ბიზნეს-კავშირების საშუალებით. ამ საკითხზე მჭიდროდ ვთანამშრომლობთ ქართველებთან.სტატიაში გამოქვეყნებული ზოგიერთი განცხადების საწინააღმდეგოდ, ჩვენ ვხედავთ საქართველოს მთავრობის შეურყეველ ინტერესს, მჭიდრო ურთიერთობა იქონიოს შეერთებულ შტატებთან, აგრეთვე ვხედავთ ძლიერ სურვილს, რომ საქართველომ ევრო-ატლანტიკური ინტეგრაცია გააგრძელოს.ბოლო წლებში ირანის მიერ საქართველოში სანქციებისათვის თავის არიდების მცდელობების გამო შეერთებული შტატების შეშფოთება გაიზარდა. შეერთებული შტატების წუხილი დღევანდელი მთავრობის ხელისუფლებაში მოსვლამდე იღებს სათავეს", - ნათქვამია განცხადებაში, რომელიც აშშ-ის საელჩოს ვებ-გვერდზეა განთავსებული.
Wall Street Journal-ში გამოქვეყნდა სტატია სათაურით "საქართველოში ირანელების ინვესტიცია სანქციების მიუხედავად იზრდება". მასში აღნიშნულია, რომ „საქართველოში თითქმის ყველა პროდუქტი არის ირანული, მიუხედავად იმისა, რომ ამერიკის შეერთებული შტატები ირანულ ბიზნესს სანქციებს უწესებს, მათ შორის - საზღვარგარეთაც. ამავე სტატიაში ამერიკის ხაზინის წარმომადგენელი ამბობს, რომ ამერიკა ორიენტირებულია, არ დაუშვას ირანელების მცდელობა, თავი აარიდონ სანქციებს, მათ შორის - შესაძლო ბიზნესკავშირებით საქართველოში". ასევე სტატიაში, აღნიშნულია, რომ ვაშინგტონის განსაკუთრებულ შეშფოთებას იწვევს სამი ბიზნესმენის საქმიანობა, რომლებიც მჭიდროდ არიან დაკავშირებულნი თეირანთან: ხუშან ხოსეინპური (Houshang Hosseinpour), პოურია ნაუები და ხუშან ფარსუდეხი (Houshang Farsoudeh). ბიზნესმენები ავიაკომპანია FlyGeorgia-ს დამფუძნებლები არიან, აკონტროლებენ JSC InvestBank-ს და ასევე საქართველოში რამდენიმე მნიშვნელოვან აქტივებს ფლობენ. ისინი უარყოფენ თავაინთ კავშირებს ირანის ხელისუფლებასთან.
