საგარეო საქმეთა მინისტრის პირველმა მოადგილემ დავით ზალკალიანმა 19-20 ივნიის ქ. ვენაში მონაწილეობა მიიღო ეუთო-ს უსაფრთხოების საკითხების გადახედვის ყოველწლიური კონფერენციაში. იგი ღონისძიებაზე სიტყვით გამოვიდა და საერთაშორისო საზოგადოებას საქართველოში არსებულ ვითარებაზე ინფორმაცია მიაწოდა.
კონფლიქტის თემატიკისადმი მიძღვნილ სხდომაზე მინისტრის მოადგილემ დამსწრე საზოგადოებას გააცნო საქართველოს ხედვა თუ როგორ შეიძლება ეუთო-ს სივრცეში არსებული კონფლიქტების მოგვარების საქმეში ორგანიზაციის როლის გაზრდა და გაძლიერება. ისაუბრა რუსეთ-საქართველოს კონფლიქტის გარშემო არსებულ ვითარებაზე.
დავით ზალკალიანმა საერთაშორისო საზოგადოების ყურადღება კიდევ ერთხელ გაამახვილა საქართველოს ოკუპირებულ რეგიონებში უსაფრთხოებისა და ადამიანის უფლებების კუთხით არსებული სავალალო მდგომარეობაზე.
მან სხდომის მონაწილეებს დეტალურად გააცნო ის არალეგალური ნაბიჯები, რომლებსაც რუსეთის საოკუპაციო ჯარი ახორციელებს ცხინვალისა და აფაზეთის რეგიონებში მავთულხლართების გავლებისა და მიწათხრილების მოწყობის სახით. დავით ზალკალიანმა აღნიშნული საკითხი განსაკუთრებული სიმწვავით განიხილა როგორც საჯარო გამოსვლის, ასევე ორხმრივი შეხვედრების ფარგლებში.
კონფერენციაზე სიტყვით გამოსვლისას საქართველოს საგარეო საქმეთა მინისტრის მოადგილემ ისაუბრა ტრანსნაციონალური საფრთხეების, მათ შორის, გლობალური ტერორიზმის წინააღმდეგ ბრძოლაში საქართველოს როლზე და იმ წვლილზე, რომელიც ქვეყანას შეაქვს რეგიონული და საერთაშორისო უსაფრთხოების უზრუნველყოფის საქმეში.
მან ხაზი გაუსვა, რომ ევროპის უსაფრთხოების სისტემის გამართული და ეფექტური ფუნქციონირება დამოკიდებულია სახელმწიფოების მხრიდან ნაკისრი ვალდებულებების პირნათლად შესრულებაზე.
ნიშანდობლივია, რომ ევროპულ და ევრაზიულ საკითხებში აშშ-ის სახელმწიფო მდივნის მოადგილემ, ერიკ რუბინმა კონფერენციაზე სიტყვით გამოსვლისას ასევე ხაზი გაუსვა საქართველოში არსებული კონფლიქების საკითხში ეუთო-ს როლის გაძლიერებისა და ეუთო-ს მისიის აღდგენის მნიშვნელობას.
ერიკ რუბინმა ყურადღება გაამახვილა საოკუპაციო ხაზის გასწვრივ საერთაშორისო მონიტორინგის, პირველ რიგში, ევროკავშირის სადამკვირვებლო მისიის დაშვების აუცილებლობაზე.
კონფერენციის ფარგლებში დავით ზალკალიანმა შეხვედრები გამართა ეუთო-ს გენერალურ მდივანთან ლამბერტო ძანიერთან, კონფლიქტების პრევენციის ცენტრის ხელმძღვანელთან ადამ კობიერაცკისთან, აშშ-ის სახელმწიფო მდივნის მოადგილესთან ერიკ რუბინთან და ეუთო-ს მომდევნო თავმჯდომარე ქვეყნების შვეიცარიისა და სერბეთის წარმომადგენლებთან.