შინაგან საქმეთა სამინისტროს მიერ ბოლო დროს გავრცელებულ ფირებში, თუ ეს ფირები, რა თქმა უნდა, სიმართლეს შეესაბამება, არის ასახული ძალიან მძიმე დანაშაული და რა თქმა უნდა ამ დანაშაულის ჩამდენები უმკაცრესად უნდა დასაჯონ, - ამის შესახებ საქართველოს პრეზიდენტმა, მიხეილ სააკაშვილმა საგანგებო ვიდეომიმართავში განაცხადა.
მისი თქმით, ეს ყველაფერი არის ამაზრზენი, ბოლომდე დასაგმობი, კარგად გამოსაძიებელი და გამოსაკვლევი.
„შინაგან საქმეთა სამინისტროს მიერ ბოლო დღეებში გავრცელებულ ფირებში, თუ ეს ფირები სინამდვილეს შეესაბამება, ძალიან მძიმე დანაშაულია ასახული. და რა თქმა უნდა, ამ დანაშაულის ჩამდენები უმკაცრესად უნდა დაისაჯონ და რა თქმა უნდა ეს ყველაფერი არის ამაზრზენი. ეს ყველაფერი ბოლომდე დასაგმობი და კარგად გამოსაძიებელი და გამოსაკვლევია. საუბარია იმაზე, რომ ჩვენ რა თქმა უნდა, მარსზე არ ვცხოვრობთ, ჩვენ ვცხოვრობდით ჩვენს ქვეყანაში და რა თქმა უნდა ბოლო წლებში ძალიან ბევრი რამ გაკეთდა, რომ საქართველოს პოლიციაში აღარ ყოფილიყო ის, რაც მანამდე ხდებოდა: ადამიანის ტანჯვა, წამება, გაუბედურება, ფულის აღება და დანაშაულის დაბრალება, ძალდატანებით აღიარების მიღება. ჩვენი ხალხი ცხოვრობდა საქართველოში და მე მგონი ყველამ იცის ის, რომ ბოლო წლებში პოლიცია ძალიან შეიცვალა და ეჭვს არ იწვევ რომ იქ სიტუაცია 99,99% შემთხვევებში ძალიან გაუმჯობესებული იყო. მაგრამ ყველა ამ სიტუაციაში შეიძლება უბედურების და საზიზღრობის კუნძული წარმოიქმნას. ყველგან შეიძლება აღმოჩნდნენ სადისტები და მოღალატეები, ძალიან ვწუხვარ, რომ ასეთები შეიპარნენ იქ ჩემი მთავრობის დროს", - განაცხადა მიხეილ სააკაშვილმა.
