საქართველოს პარლამენტის თავმჯდომარე დავით უსუფაშვილი და საპარლამენტო დელეგაციის წევრები თედო ჯაფარიძე და ვიქტორ დოლიძე დიდ ბრიტანეთში ვიზიტის ფარგლებში ვესტმინსტერის ფონდის დემოკრატიისათვის აღმასრულებელ დირექტორს, ლინდა დაფილდს და ვესტმინსტერის კონსორციუმის პროგრამის დირექტორს, ჯორჯ კუნათს შეხვდნენ.
ვესტმინსტერის ფონდის წარმომადგენლებმა ფონდის პროგრამების შესახებ ისაუბრეს, რომელიც ძირითადად პოლიტიკური პარტიებისა და პარლამენტებს შორის თანამშრომლობის განვითარებისკენაა მიმართული. ლინდა დაფილდმა ხაზგასმით აღნიშნა, რომ პოლიტიკური პარტიების სისტემის განვითარებისთვის მნიშვნელოვანია დიალოგი და ხელმისაწვდომობა. ვესტმინსტერის კონსორციუმის პროგრამის დირექტორმა, ჯორჯ კუნათმა დეტალურად ისაუბრა ფონდის მიერ საქართველოში უკვე განხორციელებული საქმიანობის შესახებ, რომლის ძირითადი მიმართულება ადამიანის უფლებები, ფინანსური ზედამხედველობა და კომუნიკაციების განვითარება იყო. პროგრამის ფარგლებში ფონდი პარლამენტის სხვადასხვა კომიტეტებთან მუშაობდა და მათ საქმიანობის ეფექტურად განხორციელებაში ეხმარებოდა. ჯორჯ კუნათი საქართველოს პარლამენტის შენობის ქუთაისში გადატანის საკითხსაც შეეხო და განაცხადა, რომ ამ ფაქტმა სამოქალაქო სექტორსა და საერთაშორისო ფონდებთან პარლამენტის თანამშრომლობის კუთხით მთელი რიგი სირთულეები წარმოშვა. ვესტმინსტერის კონსორციუმის პროგრამის დირექტორმა ასევე ისაუბრა ევროპულ სტრუქტურებში ინტეგრაციისათვის კონკურენციის პოლიტიკის განვითარების მნიშვნელობაზე.
საქართველოს პარლამენტის თავმჯდომარემ, დავით უსუფაშვილმა დიდი მადლობა გადაუხადა ფონდის წარმომადგენლებს გაწეული საქმიანობისთვის და იმედი გამოთქვა, რომ ფონდთან თანამშრომლობა მომავალშიც გაგრძელდება და გაღრმავდება. ,,ფონდის პროგრამები მნიშვნელოვანია პარლამენტარიზმის კულტურის დამკვიდრებისათვის, განსაკუთრებით მაშინ, როდესაც საქართველო საპარლამენტო მმართველობის სისტემისკენ მიისწრაფვის. მრავალპარტიული კოალიცია პარლამენტარიზმის მომხრეა და საკანონმდებლო ორგანოს როლი ქართულ პოლიტიკურ ცხოვრებაში მნიშვნელოვნად უნდა გაიზარდოს. ოქტომბრის არჩევნების შემდეგ ხალხში, სამოქალაქო საზოგადოებაში გაჩნდა მოლოდინი, რომ პარლამენტი ბოლოს და ბოლოს თავის როლს შეასრულებს და გახდება ის ადგილი, სადაც ნამდვილი პოლიტიკური პროცესები წარიმართება",-განაცხადა დავით უსუფაშვილმა. პარლამენტის თავმჯდომარემ ასევე ისაუბრა ოპოზიციისა და მრავალპარტიული კოალიციის როლზე დღევანდელ პარლამენტში, რაც ქართული პოლიტიკისთვის ახალი მოვლენაა. დავით უსუფაშვილმა აღნიშნა საკანონმდებლო პროცესში სამოქალაქო საზოგადოების მნიშვნელოვანი როლი და ისაუბრა იმაზე, თუ როგორ იყვნენ ისინი ჩართულები შრომის კოდექსის რეფორმირების ხანგრძლივ პროცესში. ,,ერთერთი მნიშვნელოვანი რამ, რაც გაკეთდა არის მაჟორიტარების ბიუროების ადგილობრივი თვითმმართველობებისგან დამოუკიდებლობა და ხალხთან დაახლოება", - განაცხადა პარლამენტის თავმჯდომარემ.
დავით უსუფაშვილმა ვესტმინსტერის ფონდის ხელმძღვანელებთან შეხვედრაზე პარლამენტის სტრუქტურის დახვეწაზეც ისაუბრა. მისი განცხადებით, საზოგადოებასთან ურთიერთობის დეპარტამენტის ძირითადი საქმიანობა უნდა იყოს, არა მხოლოდ პარლამენტის თავმჯდომარის პიარი, არამედ მთელი პარლამენტის, კომიტეტებისა და ფრაქციების საქმიანობის პოპულარიზაცია და ხალხთან მიტანა. ,,საპარლამენტო განვითარება მნიშვნელოვანია ჩვენთვის და ამაში საერთაშორისო ფონდებისა და ორგანიზაციების, ასევე ადგილობრივი არასამთავრობო სექტორის დახმარება ძალიან გვჭირდება",-აღნიშნა დავით უსუფაშვილმა. შეხვედრის დასასრულს მხარეები შეთანხმდა, რომ თანამშრომლობა მომავალშიც გაგრძელდება, რაც ორმხრივად სასარგებლო იქნება.