სამტრედიის საკრებულოში ფრაქცია ,,ნაციონალები" კიდევ ერთმა დეპუტატმა მიხეილ ნიკოლეიშვილმა დატოვა. როგორც ,,ჯი-ეიჩ-ენთან" საუბარში ნიკოლეიშვილმა განაცხადა, საბოლოოდ მისი ფრაქციიდან წამოსვლის გადაწყვეტილება სამეგრელოში აღმოჩენილმა სამალავებმა განაპირობა.
,,ფრაქციიდან წამოსვლის შესახებ დიდი ხნის განმავლობაში ვფიქრობდი, რადგან საკრებულოში ბევრი მეგობარი მყავს და საბოლოო გადაწყვეტილების მიღება მიჭირდა, მაგრამ სამეგრელოში აღმოჩენილი სამალავების შემდეგ, ამ ტვირთის ზიდვა აღარ შემეძლო, ამიტომ გადავწყვიტე დავდგე სამტრედიელებისა და ქართველი ხალხის გვერდით", -განაცხადა ,,ჯი-ეიჩ-ენთან" საუბარში მიხეილ ნიკოლეიშვილმა და იმედი გამოთქვა, რომ მისი ყოფილი კოლეგები ფრაქცია ,,ნაციონალებიდან" სწორ გადაწყვეტილებას მიიღებენ.
,,დღემდე 22 დეპუტატისგან შედგებოდა ფრაქცია. იმედი მაქვს, რომ ჩემი კოლეგები მომბაძავენ, რადგან ისინი კარგად მოაზროვნე ადამიანები არიან", _განაცხადა ნიკოლეიშვილმა.
მისივე განცადებით, ის სამტრედიის საკრებულოში დამოუკიდებელ დეპუტატად დარჩება და ხვალ დაგეგმილ საკრებულოს თავმჯდომარის არჩევნებზე მხარს კოალიცია ,,ქართული ოცნების" კანდიდატურას დაუჭერს მხარს.
,,დავრჩები დამოუკიდებელ დეპუტატად. ჩემი სურვილია, სამტრედიას უხელმძღვანელოს ,,ქართულმა ოცნებამ" და რაიონისთვის რაიმე სასიკეთო გააკეთოს", - განაცხადა მიხეილ ნიკოლეიშვილმა.