საპარლამენტო უმრავლესობის წევრები თინა ხიდაშელი და ზვიად კვაჭანტირაძე პატიმართა წამების გახმაურებული კადრებს ავტორის, ვლადიმერ ბედუკაძის პასუხისმგებლობისგან გათავისუფლებას არასწორ გადაწყვეტილებად მიიჩნევენ. ამის შესახებ დეპუტატებმა რუსთავი-2-ის გადაცემა პოზიციაში განაცხადეს.
,,ლადო ბედუკაძეს ბრალი თუ არჩილ კბილაშვილის გადაწყვეტილებით მოეხსნა, ეს კბილაშვილის შეცდომაა", -განაცახადა კოალიცია ,,ქართული ოცნების" დეპუტატმა თინა ხიდაშელმა ,,პოზიციაში" და აღნიშნა, რომ მისთვის მიუღებელია ბედუკაძის პასუხისმგებლობისგან გათავისუფლება.
,,ლადო ბედუკაძესთან დაკავშირებით ჩემი პოზიცია არის ცნობილი და თქვენგან სწორედ იმით განვსხვავდებით, რომ იმის მიუხედავად ხელისუფლების ნაწილი ვართ თუ არა ეს არ მიშლის ხელს იმაში, რომ როდესაც ვხედავ პრობლემას ამაზე არ ვილაპარაკო. არის დანაშაული რომელზეც არ არსებობს ვისელ ბროუელია თუ ვინ და ის ძალიან სასარგებლოა გამოძიებისთვის კონკრეტულ მომენტში, მაგრამ არის დანაშაულები, საერთაშორისო წესებით დადგენილი და არა რომელიმე კონკრეტული ქვეყნის კანონმდებლობით, რომელზეც არ არსებობს პატიება, რომლისთვისაც პასუხისმგებლობა აუცილებლად უნდა დადგეს. წამება არის ნომერი ერთი ამ ჩამონათვალში და სხვათა შორის მერე მოდის გენოციდი და სხვა დანაშაულებები. ადამიანი თუ მხილებულია და არსებობს ფაქტები დადასტურებული სასამართლოს მიერ წამების დანაშაულში, როგორც არ უნდა თანამშრომლობდეს ის გამოძიებასთან, აქ შეიძლება იყოს შემსუბუქებაზე ლაპარაკი, მაგრამ არავითარ შემთხვევაში არ შეიძლება ვილაპარაკოთ პასუხისმგებლობისგან გათავისუფლებაზე", - განაცხადა ხიდაშელმა და აღნიშნა, რომ ლადო ბედუკაძეს თუ არჩილ კბილაშვილის გადაწყვეტილებით მოეხსნა ბრალი მთვარმა პროკურორმა ამით შეცდომა დაუშვა.
,,თუ ეს არის არჩილ კბილაშვილის გადაწყვეტილება, ეს არის არჩილ კბილაშვილის შეცდომა. მე არ ვიცი ვისი გადაწყვეტილებაა, არავითარი მნიშვნელობა არ აქვს ჩემთვის ვისი გადაწყვეტილებაა. უბრალოდ არის რაღაცეები რაც სწორი არ არის", - განაცხადა ,,პოზიციაში" ხიდაშელმა.
