,,პოლიტიკური ცხოვრება ჯერ კიდევ არ არის სტაბილური", _განაცხადა პრალმანეტის თავმჯდომარემ დავით უსუფაშვილმა ბრიუსელში ევროპის პარლამენტის საგარეო საქმეთა კომიტეტის თავმჯდომარე, ელმარ ბროკთან შეხვედრისას.
ევროპის პარლამეტის საგარეო საქმეთა კომიტეტის თავმჯდომარემ მადლობა გადაუხადა საქართველოს პარლამენტის თავმჯდომარეს მიბრძანებისათვის და სთხოვა გაეცნო მისთვის საქართველოს დღევანდელი პოლიტიკური ვითარება. მან ასევე ხაზი გაუსვა ოპოზიციის ერთ-ერთი ლიდერის, ივანე მერაბიშვილის დაპატიმრების საკითხს და ისაუბრა იმ შეშფოთებებზე, რაც არსებობს იმასთან დაკავშირებით, თუ როგორ ექცევიან ოპოზიციას საქართველოში.
,,საქართველოში დღეს საინტერესო ცხოვრება გვაქვს, 7-8 თვეა რაც ახალი მთავრობა ჩამოყალიბდა, თუმცა პოლიტიკური ცხოვრება ჯერ კიდევ არ არის სტაბილური. ჩვენ აქტიურად ვმუშაობთ ახალ რეფორმებზე, რათა ქვეყანა მიუახლოვდეს ევროპულ სტანდარტებს. პარლამენტი მზადაა მიიღოს წინადადებები, შენიშვნები და რეკომენდაციები, რათა დაიხვეწოს ქართული კანონმდელობა", - აღნიშნა დავით უსუფაშვილმა.
პარლამენტის თავმჯდომარემ ისაუბრა ახალი შრომის კოდექსისა და პრეზიდენტის მხრიდან ვეტოს დადების ალბათობის შესახებ. რაც შეეხება ივანე მერაბიშვილს და ზოგადად ოპოზიციას, დავით უსუფაშვილის თქმით, ახალი ხელისუფლება კარგად აცნობიერებს იმ რეალობას, რაც დღეს ქვეყანაში არსებობს.
"9 წლის განმავლობაში მხოლოდ ერთი პოლიტიკური ძალის წარმომადგენლები იკავებდნენ ყველა მნიშვნელოვან თანამდებობას, უამრავი საქმეა გამოსაძიებელი და არ უნდა იყოს გასაკვირი, თუ გამოძიებას ყოფილ მაღალჩინოსნებამდე მივყავართ. პრემიერ-მინისტრმა, ბიძინა ივანიშვილმა არაერთხელ მიმართა ევროპელ მეგობრებს, რომ ქვეყნის შიგნით მიმდინარე პროცესების მონიტორინგი გაეწიათ. შედეგად, საქართველოში ჩამოვიდა ბატონი ჰამერბერგი. ჩვენ მზად ვართ კითხვებს ვუპასუხოთ და განვმარტოთ თითოეული ნაბიჯი", - განაცხადა დავით უსუფაშვილმა ელმარ ბროკთან საუბრისას და იმედი გამოთქვა, რომ ევროპელი კოლეგები მიუკერძოებლ და საქართველოს მომავალი განვითარებისათვის სასიკეთო შეფასებებს გააკეთებენ.