რუსეთის ფედერაცია მზადაა სატრანსპორტო საკითხებზე საქართველოსთან კონსულტაცია გამართოს, კერძოდ, საუბარია საჰაერო მიმოსვლაზე. განცხადება ამის შესახებ დღეს რუსეთის საგარეო საქმეთა სამინისტროს ოფიციალურმა წარმომადგენელმა ალექსანდრე ლუკაშევიჩმა გააკეთა. ინფორმაციას ამის შესახებ რუსული მედია ავრცელებს.
„მოსალოდნელია, რომ ჩვენმა სატრანსპორტო სააგენტოებმა და ტრანსპორტის სამინისტრომ ცალკე საუბარი გამართონ ჩვენს ქართველ კოლეგებთან სატრანსპორტო საკითხებთან დაკავშირებით. პირველ რიგში საჰაერო მიმოსვლასთან დაკავშირებით", _ განაცხადა ლუკაშევიჩმა.
მისივე თქმით, „უკვე მოქმედებს საკმარისად რეგულარული ჩარტერული რეისები მოსკოვს, ეკატერინბურგს, თბილისსა და ბათუმს შორის".
„გარკვეული დინამიკა შეინიშნება და ჩვენ ყველანაირად ვიმედოვნებთ, რომ ის გარკვეულად წინ წაგვწევს ჩვენს ორმხრივ ურთიერთობებში", _ განაცხადა ლუკაშევიჩმა.
