რეზოლუცია, რომელსაც 63-მა სახელმწიფომ დაუჭირა მხარი და საწინაარმდეგო პოზიცია 16-მა დააფიქსირა, გმობს საქართველოს ოკუპირებულ რეგიონებში ძალისმიერი გზით განხორციელებულ დემოგრაფიულ ცვლილებებს და ჟენევის მოლაპარაკებების მონაწილეებს მოუწოდებს, დევნილი მოსახლეობის საკუთარ სახლებში დაბრუნების უზრუნველსაყოფად ძალისხმევა გაააქტიურონ.

რეზოლუცია ასევე ხაზს უსვამს აფხაზეთისა და ცხინვალის რეგიონებში ჰუმანიტარული საქმიანობის შეუფერხებლად განხორციელების აუცილებლობას, ლტოლვილების და იძულებით გადაადგილებული პირთა საკუთრების უფლების დაცვის მნიშვნელობას.
ამასთან, რეზოლუცია გაერო-ს გენერალურ მდივანს ავალდებულებს, დევნილი მოსახლეობის ირგვლივ არსებული მდგომარეობის შესახებ გენერალურ ასამბლეას ყოველწლიურად მოახსენოს.

გენერალური მდივნის შემდეგი მოხსენება ამ საკითხზე მიმდინარე წლის სექტემბერში იგეგმება.

გენერალურმა ასამბლეამ მსგავსი რეზოლუცია პირველად 2008 წელს მიიღო და მას შემდეგ ყოველწლიურად ადასტურებს ლტოლვილების და იძულებით გადაადგილებული პირების საკუთარ სახლებში ნებაყოფლობითი, ღირსეული და უსაფრთხო დაბრუნების აუცილებლობას. აღსანიშნავია, რომ რეზოლუციას თავდაპირველად მხოლოდ 14 მხარდამჭერი ჰყავდა, ხუთი წლის განმავლობაში კი მათი რიცხვი 60-მდე გაიზარდა.

საქართველოს საგარეო საქმეთა მინისტრი მაია ფანჯიკიძე იმედოვნებს, რომ პოზიტიური ტენდენცია წელსაც შენარჩუნებული იქნება, თუმცა აცხადებს, რომ გაერო-ში ელჩის არყოფნა იმ დროს, როდესაც რეზოლუციაზე მხარდაჭერის მოპოვებისთვის სხვადასხვა ქვეყნებთან ბევრი მუშაობაა საჭირო, გარკვეულწილად, შემაფერხებელ ფაქტორს წარმოადგენს.

"რეზოლუციას წმინდა ჰუმანიტარული მნიშვნელობა აქვს. ის გმობს ძალადობრივი გზით დემოგრაფიული ცვლილებების განხორციელებას და ხაზს უსვამს საქართველოს ოკუპირებული ტერიტორიებიდან იძულებით გადაადგილებულ პირთა საკუთარ სახლებში უსაფრთხო დაბრუნების მნიშვნელობას. საგარეო საქმეთა სამინისტროსთვის ეს იყო ბოლო რამდენიმე ხნის განმავლობაში ძალიან ინტენსიური მუშაობის საგანი და ჩვენ იმედს გამოვთქვამთ, რომ, რეზოლუციის ჰუმანიტარული ხასიათისა და მიზნების გათვალისწინებით, საერთაშორისო საზოგადოება კიდევ ერთხელ დაუჭერს მხარს ამ რეზოლუციას 13 ივნისს გაერო-ს გენერალური ასამბლეის 67-ე სესიაზე", - განაცხადა ფანჯიკიძემ.

ქართული მხარის რეზოლუციას მხარს უჭერს აშშ, დასავლეთ ევროპისა და ბალტიის ქვეყნები, აზერბაიჯანი და სხვა.

რეზოლუციას მხარს არ უჭერს რუსეთი და სომხეთი, ისრაელი. ისრაელი თავშეკავების მიზეზად ახლო აღმოსავლეთის კონტქსტს ასახელებს.