ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ჩეხეთის რესპუბლიკაში სამუშაო ვიზიტის ფარგლებში საგარეო საქმეთა მინისტრის პირველ მოადგილესა და ევროპულ საქმეთა მდივან ირჟი შნაიდერს, თავდაცვის მინისტრის პირველ მოადგილე დანიელ კოსტოვალს, ევროპულ საკითხებში ჩეხეთის მთავრობის აპარატის სახელმწიფო მდივან ვოიტეხ ბელინგს, ასევე, ჩეხეთის რესპუბლიკის სენატის საგარეო ურთიერთობათა, თავდაცვისა და უშიშროების კომიტეტის თავმჯდომარე იოზეფ რეგეცს და სხვა სენატორებს შეხვდა.
შეხვედრებზე მხარეებმა საქართველო-ჩეხეთს შორის სხვადასხვა სფეროებში ორმხრივი და მრავალმხრივი თანამშრომლობის გაღრმავების საკითხები განიხილეს.
სახელმწიფო მინისტრმა მადლობა გადაუხადა ჩეხურ მხარეს საქართველოს ტერიტორიული მთლიანობის ურყევი მხარდაჭერისა და საქართველოს ოკუპირებული რეგიონების არაღიარების პოლიტიკის მტკიცედ გატარებისათვის. ასევე, განსაკუთრებით აღნიშნა ჩეხეთის რესპუბლიკის მნიშვნელოვანი წვლილი საქართველოში ევროკავშირის სადამკვირვებლო მისიაში და მასში ჩეხი მონიტორების მონაწილეობა.
შეხვედრებზე ალექსი პეტრიაშვილმა ხაზი გაუსვა ჩეხეთის რესპუბლიკის მხრიდან საქართველოს ევროპულ და ევროატლანტიკურ სტრუქტურებში ინტეგრაციის პროცესის თანმიმდევრულ მხარდაჭერას. სახელმწიფო მინისტრმა აღნიშნა, რომ ნატო-სა და ევროკავშირში გაწევრიანება საქართველოს მთავარ საგარეო-პოლიტიკურ პრიორიტეტად რჩება და ინფორმაცია მიაწოდა ჩეხურ მხარეს ამ მიმართულებით ხელისუფლების მიერ უკვე განხორციელებული და მომავალში დაგეგმილი ღონისძიებების შესახებ.
თავის მხრივ, შეხვედრებზე ჩეხეთის ხელისუფლების წარმომადგენლებმა განაცხადეს, რომ ჩეხეთის რესპუბლიკა მხარს უჭერს ევროკავშირის გაფართოების პოლიტიკას, ასევე, დაადასტურეს ჩეხეთის მზაობა განაგრძოს საქართველოს მხარდაჭერა ევროინტეგრაციის გზაზე და საქართველოს გაუზიაროს საკუთარი გამოცდილება ევროპულ და ევროატლანტიკურ სტრუქტურებში ინტეგრაციის კუთხით.
შეხვედრებზე ჩეხური მხარის წარმომადგენლებმა მადლობა გადაუხადეს ქართულ მხარეს ISAF-ის ავღანეთის მისიაში შეტანილი წვლილისათვის და ღრმა მწუხარება გამოთქვეს ავღანეთში ქართველი სამხედრო მოსამსახურეების დაღუპვის გამო. ჩეხეთის ხელისუფლების წარმომადგენლებმა, ასევე, განსაკუთრებით აღნიშნეს საქართველოს მალის მისიაში ჩართვის დადებით მნიშვნელობა.
„ყველა შეხვედრაზე ერთმნიშვნელოვნად დაფიქსირდა ჩეხეთის მხარდაჭერა საქართველოს ევროკავშირსა და ნატო-ში გაწევრიანების საკითხთან დაკავშირებით, უკლებლივ ყველა ჩვენი კოლეგა, ვისთანაც გვქონდა შეხვედრა, ხაზს უსვამდა საქართველოს მიერ შეტანილ წვლილს საერთაშორისო უსაფრთხოებაში და საქართველოს ხელისუფლების მიერ განხორციელებულ ნაბიჯებს ნატო-ში და ევროკავშირში გაწევრიანების თვალსაზრისით. იმედი გვაქვს, რომ ერთად შევძლებთ ვილნიუსის სამიტზე ასოცირების შეთანხმების პარაფირებას, ასევე, გვაქვს მოლოდინი, რომ როდესაც იქნება მსჯელობა ნატოს გაფართოების საკითხებზე, საქართველო მიიღებს მაქსიმალურ მხარდაჭერას. ამის მტკიცე გამოხატულება იყო დღევანდელი შეხვედრები ჩვენ ჩეხ კოლეგებთან"-განაცხადა შეხვედრების დასრულების შემდეგ ალექსი პეტრიაშვილმა.
ჩეხეთის რესპუბლიკაში სამუშაო ვიზიტის ფარგლებში სახელმწიფო მინისტრი შეხვედრებს ჩეხეთის დეპუტატთა პალატის ევროპულ საქმეთა კომიტეტის თავმჯდომარე იან ბაუერთან და საგარეო ურთიერთობათა კომიტეტის თავმჯდომარის მოადგილეებთან-კატერჟინა კონეჩნასთან, ლენკა ანდრისოვასთან და რობინ ბიონიშთან გამართავს.
ჩეხეთის რესპუბლიკაში სამუშაო სამუშაო ვიზიტის დასრულების შემდეგ ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი პოლონეთში გაემგზავრება. ალექსი პეტრიაშვილი მონაწილეობას მიიღებს ვროცლავის გლობალურ ფორუმში და სიტყვით გამოვა ფორუმის სესიაზე-„ნატოს გაფართოების მომავალი". ფორუმის ფარგლებში იგეგმება სახელმწიფო მინისტრის ორმხრივი შეხვედრა პოლონეთის საგარეო საქმეთა მინისტრთან რადოსლავ შიკორსკისთან.