დავით ბაქრაძისთვის უშიშროების საბჭოს სხდომაზე ელჩების დანიშვნა არ დანიშვნის საკითხის წამოყენება მიუღებელია. როგორც უშიშროების საბჭოს დაწყებამდე საპარლამენტო უმცირესობის ლიდერმა დავით ბაქრაძემ განაცხადა, დღეს მთავარი განსახილველი თემა სოციალურ ქსელებში გავრცელებული ვიდეო კადრები უნდა იყოს.
„დღეს არსებობს ერთი კონკრეტული საკითხი, რომელიც ჩვენს მოსახლეობას აღელვებს, არსებობს კონკრეტული ძალა - ადამიანთა ჯგუფი, რომელიც ემუქრება მთელ ქვეყანას, მთელ შეიარაღებას ტერაქტის მოწყობით, აფეთქებებით. ამიტომ ეს არის ის თემა, რომელზეც ყველამ ერთად სერიოზულად უნდა ვიმსჯელოთ. ეს არის ის თემა, რომელზეც ჩვენ სახელმწიფო მოხელეებმა გვერდზე უნდა გადავდოთ ყველა სხვა საქმე, ერთად დავჯდეთ და გავაანალიზოთ როგორ დავიცვათ ჩვენი ჯარისკაცების სიმშვიდე და უსაფრთხოება", _ განაცხადა დავით ბაქრაძემ და აღნიშნა, რომ მისთვის მიუღებელია რატომ ხდება ამ ეტაპზე ელჩების დანიშვნა არ დანიშვნით სპეკულირება.
„გაუგებარია და მიუღებელია ჩემთვის სხვა თემების წამოწევა, რა კავშირშია ტერაქტებთან ელჩების დანიშვნა არ დანიშვნა. ვილაპარაკოთ ყველა იმ აქტუალურ საკითხზე, რომელიც ქვეყნისთვის მნიშვნელოვანია. დავრწმუნდეთ იმაში, რომ ჩვენი ქვეყანა ჩვენი ჯარისკაცები უსაფრთხოდ არიან და მერე ვისაუბროთ ნებისმიერ სხვა თემაზე, ელჩებზე, ბუღალტრებსა თუ მაკშეიდერებზე", _ განაცხადა ჟურნალისტებთან საპარლამენტო უმცირესობის ლიდერმა დავით ბაქრაძემ.
შეგახსენებთ, რომ პრეზიდენტის ავლაბრის რეზიდენციაში ამ წუთებში უშიშროების საბჭოს სხდომა მიმდინარეობს, რომელსაც საქართველოს პრემიერ-მინისტრი ბიძინა ივანიშვილი არ ესწრება. როგორც დღეს ჟურნალისტებთან შეხვედრისასა მაია ფანჯიკიძემ განაცხადა უშიშროების დღევანდელ სხომაზე სხვა საკითხებთან ერთად ელჩების არ დანიშვნის საკითხსაც განიხილავს.
