საქართველოს პრეზიდენტმა მიხეილ სააკაშვილმა შინაგან საქმეთა მინისტრს ირაკლი ღარიბაშილს დავალება მისცა დაადგინოს თუ ვინ და სად დაამზადა სკანდალური და მუქარისშემცველი ვიდეორგოლები. პრეზიდენტის თქმით, ძალიან ადვილია დაადგინო სად დამზადდა, ვინ დაამზადა და ვისი ხმა ედო ამ ყველაფერს.
„დიდი ალბათბით, ეს ვიდეორგოლები არც ავღანეთშია დამზადებული და არც თალიბების მიერ. ამას ადასტურებენ უკვე ექსპერტები მათ შორის, ნატოს სტრუქტურები. დიდი ალბათობით, ეს ვიდერგოლები შეკვეთილია და დამზადებულია საქართველოში, ქართველების მიერ, ჩემთვის გაუგებარი, მაგრამ სრულიად კონკრეტული პოლიტიკური მიზნებისთვის", - განაცხადა პრეზიდენტმა და აღნიშნა, რომ ეს არის უპრეცედენტო დანაშაული და ყველა ზღვარს სცდება.
„მე მინდა არა ვთხოვო, არამედ მოვთხოვო შინაგან საქმეთა მინისტრს, დავავალო შინაგან საქმეთა მინისტრს: დაუყოვნებლივ დაადგინეთ ამ კლიპის შემქნელები... ვინც არ უნდა იყვნენ ისინი. ეს არ არის რთული სქმე, ეს არის ძალიან მარტივი ტექნიკური საკითხი, ეს არის პოლიტიკური ნების საკითხი", - განაცხადა პრეზიდენტმა და აღნიშნა, რომ ამ საქმეს თავად მიყვება ბოლომდე, რომ ვინმემ არ მიაჩუმათოს.
