,,შინაგან საქმეთა სამინისტრო ამჟამად აქტიურად მუშაობს, რათა დაადგინოს თუ საიდან მოხდა თალიბანის სახელით ვიდეოს ატვირთვა", _ განაცხადა შს მინისტრმა ირაკლი ღარიბაშვილმა გუშინ გავრცელებული ვიდეოს კომენტირებისას.
,,მიმდინარეობს დადგენა თუ რომელი ქვეყნიდან, რომელი IP მისამართიდან მოხდა ამ ვიდეოს ატვირთვა. ჩვენ აქტიურად გვეხმარებიან უცხოელი პარტნიორები. ამ ეტაპზე სხვა დამატებით ინფორმაციას ვერ მოგაწვდით", _განაცხადა ღარიბაშვილმა.
შინაგან საქმეთა მინისტრი აცხადებს, რომ პანიკის არავითარი საფუძველი არ არსებობს. მინისტრი მოუწოდებს მოსახლეობას სიმშვიდისაკენ და აცხადებს, რომ ქვეყანაში უსაფრთხოების ზომები უმაღლეს დონეზეა დაცული.
შეგახსენებთ, რომ Youtube-ზე გუშინ გავრცელდა ვიდეო სახელწოდებით - "ჯიჰადი ავღანეთში საქართველოს ჯარების წინააღმდეგ".
ვიდეო ISAF-ის მისიაში მონაწილე საქართველოს შეიარაღებული ძალების წინააღმდეგ მუქარას შეიცავს და მასში ქართველი ჯარისკაცები არიან ნაჩვენები. ვიდეო მუქარას საქართველოს პრეზიდენტის, მიხეილ სააკაშვილის მიმართაც შეიცავს და ხაზგასმულია, რომ შურისძიება მალე საქართველოშიც დაიწყება.
