გავერთიანდეთ და ერთად გამოვიძიოთ ვის მიერაა დამზადებული პანიკის დასათესად დამზადებული ვიდეო კლიპი, - აცხადებს საპარლამენტო უმცირესობის წევრი დავით საყვარელიძე.
„მოვუწოდებ ხელისუფლებას, როგორც ერთ-ერთი საქართველოს მოქალაქე, და არა როგორც პოლიტიკური მოწინააღმდეგე, გავერთიანდეთ და ერთად გამოვიძიოთ ყველა არსებული თანამედროვე ტექნიკური საშუალებით, სად და ვის მიერაა დამზადებული ჩვენი ხალხის მოსატყუებლად და შესაშინებლად, პანიკის დასათესად დამზადებული ვიდეო კლიპი! ორი დღეა მეტს არაფერს ვუყურებ, გარდა ტერორისტების მიერ წლების განმავლობაში დამზადებული მსგავსი კლიპებისა და ვადარებ. მერწმუნეთ, ასეთი დალაგებული და მაღალ დონეზე შესრულებული არც ერთი მათგანი არ არის. კლიპში აშკარად ჩანს ქართული ისტორიის ცალკეული ფრაგმენტის კარგი ცოდნა, ყველაზე თანამედროვე ელემენტების ჩათვლით. ძირითადად იმაზეა აგებული, რასაც წლებია აქტიურად იყენებს რუსული სპეცსამსახურების და მასმედიის ბინძური პროპაგანდა საქართველოს წინააღმდეგ. ჰოლივუდის ფილიდან ამოჭრილ კადრებზე აღარაფერს ვამბობ! გამოვიძიოთ და დარწმუნებული ვარ ყველაფერი გაირკვევა საიდან მოდის ეს ყველაფერი და ვისი დაგეგმილია! ახლა ქიშპობის და ერთმანეთთან კინკლაობის დრო არ არის და არც პოლიტიკური ქულების ჩაწერის" - აცხადებს საყვარელიძე.