აჭარის უმაღლესი საბჭო უმრავლესობასა და უმცირესობას ამ დრომდე არ არეგისტრირებს. კანონით დადგენილი ნორმის შესრულებას უმრავლესობისგან აჭარის უმაღლესი საბჭოს წევრი პეტრე ზამბახიძე ოფიციალურად ითხოვს.
პეტრე ზამბახიძე საკანონმდებლო ორგანოს უმრავლესობას მიმართავს და მოუწოდებს მხარი დაუჭიროს ინიციატივას, რომელიც უმრავლესობისა და უმცირესობის ოფიციალურად დარეგისტრირებას ითვალისწინებს.
ზამბახიძე აცხადებს, რომ უმაღლესი საბჭოს წევრები უმრავლესობად ოფიციალურად დარეგისტრირების პროცესს აჭიანურებენ, რაც, თავის მხრივ, პოლიტიკურ ოპოზიციას არ აძლევს საშუალებას შექმნას "უმცირესობა" და აირჩიოს ლიდერი.
კანონის მიხედვით, უმრავლესობის შექმნა შეუძლიათ ფრაქციებს, თუ უმაღლესი საბჭოს წევრთა საერთო რაოდენობა სიითი შემადგენლობის ნახევარს აღემატება. უმცირესობის შექმნა კი შეუძლიათ ფრაქციებს, თუ უმაღლესი საბჭოს დეპუტატთა რაოდენობა უმრავლესობის გარეთ დარჩენილ წევრთა რაოდენობის ნახევარს აღემატება.
აჭარის უმაღლესი საბჭოს ვიცე-სპიკერი დავით ბაციკაძე უმრავლესობისა და უმცირესობის ოფიციალურად დარეგისტრირებას მიზანშეუწონლად მიიჩნევს,ვინაიდან უმაღლეს საბჭოში რამდენიმე ფრაქციაა და უმრავლესობის და უმცირესობის ოფიციალურად დარეგისტრირება მხოლოდ დამატებით საბიუჯეტო ხარჯებთან იქნება დაკავშირებული.
