2013 წელს საქართველო-ბრაზილიას შორის არსებული დიპლომატიური ურთიერთობების 20 წლისთავი 29 მაისს საქართველოს დამოუკიდებლობის დღისადმი მიძღვნილ ღონისძიებაზე აღინიშნა.
მოწვეული საზოგადოების წინაშე სიტყვით წარსდგა ბრაზილიის სენატში ახლად შექმნილი საქართველოს მეგობართა ჯგუფის პრეზიდენტი ალოისიო ნუნეს ფერეირასი, რომელმაც აღნიშნული ჯგუფის შექმნის და ბრაზილია-საქართველოს ურთიერთობებში მისი შესაძლო წვლილის, ასევე საელჩოსთან მომავალი ერთობლივი საქმიანობის შესახებ ისაუბრა.
ბრაზილიის ფოსტისა და ტელეგრაფის უწყებამ ოფიციალურად წარადგინა ორმხრივი დიპლომატიური ურთიერთობისადმი მიძღვნილი საფოსტო მარკა. საქართველოს პატივსაცემად გამოცემული საფოსტო ნიშანი ორ ნაწილიანია და მისი გამოცემის თარიღი, სიმბოლურად, 26 მაისია. ის ბრაზილიელი მხატვრის ფერწერულ ტილოს - „ტყისმჭრელი" და ნიკო ფიროსმანის ცნობილი ნამუშევრის - „მეთევზე წითელ პერანგში" გამოსახულებას წარმოადგენს.
