"ჩვენ მხარს ვუჭერთ ევროპულ და ევროატლანტიკურ ინტეგრაციას. მიზეზიც მარტივია: მსოფლიოში არ არსებობს უკეთესი ალტერნატივა. ეს ოფიციალური და მოკლე პასუხია",_ აცხადებს საქართველოს პარლამენტის საგარეო ურთიერთობათა კომიტეტის თავმჯდომარე თედო ჯაფარიძე ესტონური გამოცემა „Eesti Päevaleht"-სათვის მიცემულ ინტერვიუში.
"მინდა დავარწმუნო ის პირები, რომლებიც სკეპტიკურად არიან განწყობილი საქართველოს ახალი ხელიუფლების მიმართ იმის გამო, რომ საქართველოდან მოდის განსაკუთრებით ბევრი ინფორმაცია, რომელიც იწვევს უამრავ შეკითხვას სხვადასხვა ქვეყნებში, მათ შორის ესტონეთში. შედეგად შეიძლება შეიქმნას შთაბეჭდილება, რომ ჩვენ გადავიხარეთ ევროპული და ევროატლანტიკური ინტეგრაციის კურსიდან.
მინდა სრულად დაგარწმუნოთ, რომ ჩვენი მისწრაფება ევროპული ფასეულობებისაკენ, რომ საქართველო ევოლუციური და სისტემური ინსტიტუციონალიზაციის გზით გახდება ევროკავშირის და ევროატლანტიკური თანამეგობრობის ნაწილი ისე მტკიცედ შევიდა ქართველების შეგნებაში და ფსიქოლოგიაში, რომ იგი გახდა მთელი საქართველოს აზროვნების ნაწილი", _ აცხადებს ჯაფარიძე და აღნიშნავს, რომ მიუხედავად მთავრობის შეცვლისა - თეორიულად თუ წარმოვიდგენთ, რომ ამჟამინდელი კოალიციის ლიდერი მოისურვებს, თუნდაც კურსის შეცვლას - ეს პრაქტიკულად შეუძლებელი იქნება.
