"სამხრეთ ოსეთის საზღვრისპირა დასახლებული პუნქტები სერიოზულ ყურადღებას საჭიროებენ. იქ, უმოკლეს ვადაში აუცილებლად უნდა გაუმჯობესდეს ადგილობრივი მოსახლეობის საყოფაცხოვრებო და სოციალური პირობები". ეს განცხადება რუსეთის უშიშროების საბჭოს მდივნის მოადგილემ რაშიდ ნურგალიევმა გააკეთა. ინფორმაციას ამის შესახებ ე.წ. სამხრეთ ოსეთის ბეჭდვისა და ინფორმაციის კომიტეტი ავრცელებს.
მისივე თქმით, საზღვრისპირა განვითარების პროგრამა მოიცავს სწორედ ამ სოფლებს, რომლებსაც აუცილებლად სჭირდებათ სკოლები, საბავშვო ბაღები, სატრანსპორტო მისაწვდომობა, მათ შორის წყალმომარაგება.
"ჩვენ უნდა გვესმოდეს, რომ რესპუბლიკის ყველა მოქალაქე თავს ერთიან სახელმწიფოში უნდა გრძნობდეს", _ აცხადებს ნურგალიევი და განსაკუთრებული ყურადღება გაამახვილა იმ სახლებზე, რომლებიც მისი თქმით "პირდაპირ სახელმწიფო საზღვარზე არიან განლაგებულნი".
"ასეთი სახლები საკმაოდ ბევრია. საზღვრის გასწვრივ 200 ხის სახლის აგება მოგვიწევს, რომელთა აგება საპროექტო-სპეტურ დოკუმენტაციას არ საჭიროებს.
გვაქვს უკვე კონკრეტული მონახაზები. განსაკუთრებული ყურადღება უნდა დაეთმოს რესპუბლიკის დასავლეთის საზღვრებს - სინაგურის, ქარძმანის მიმართულებებს ძაურის რაიონში.
უკვე მიმდინარე წელს შეგვეძლო 200 თუ არა 30 ობიექტის მშენებლობა იმ ადგილებში სადაც სიტუაცია უკვე ზღვრამდეა მისული. ამის გაკეთებას ახალი პროგრამის შემუშავებს შემდეგ ვაპირებდით, მაგრამ აზრი აქვს პირველი ნაბიჯები უკვე არსებული პროგრამებით გადავდგათ", _ აცხადებს რაშიდ ნურგალიევი.
