მაია ფანჯიკიძე უშიშროების საბჭოს წინადადებით მიმართავს, რომ დღეს დაგეგმილი სხდომა გადაიდოს. როგორც აშშ-ში ვიზიტად მყოფმა საგარეო საქმეთა მინისტრმა მაია ფანჯიკიძემ განაცხადა, ის და თავდაცვის მინისტრი, რომლებიც საბჭოს წევრები არიან, სხდომაზე დასწრებას ქვეყანაში არყოფნის გამო ვერ ახერხებენ.
"უშიშროების საბჭოს სხდომის დანიშვნა ძალიან კარგია, ამ გადაწყვეტილებას მივესალმები. სამწუხაროდ არც მე და არც თავდაცვის მინისტრი თბილისში არ ვიმყოფებით, ამიტომ როგორც საგარეო საქმეთა სამინისტროდან ჩემმა მოადგილემ შემატყობინა, იქნება წინადადება, რომ ეს სხდომა ორშაბათისთვის გადაიდოს. ამ დროისთვის მეც და ირაკლი ალასანიაც თბილისში ვიქნებით. იმედი მაქვს რომ სხდომა გადაიდება, რადგან ეს იქნება პირველი სხდომა მას შემდეგ, რაც ახალი მთავრობაა ხელისუფლებაში. სწორედ ამიტომ მიმაჩნია, რომ უწყებების პირველი პირები სხდომას ესწრებოდნენ",- განაცხადა მაია ფანჯიკიძემ.
შეგახსენებთ, უშიშროების საბჭოს სხდომა პრეზიდენტის რეზიდენციაში დღეს 16:00 საათზეა ჩანიშნული. ამასთან, ჯერჯერობით უცნობია, დაესწრება თუ არა სხდომას პრემიერ-მინისტრი ბიძინა ივანიშვილი.
