3 ივნისს, მთავრობის კანცელარიაში ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი ნატოს გენერალური მდივნის სპეციალურ წარმომადგენელს კავკასიასა და ცენტრალურ აზიაში ჯეიმს აპატურაის შეხვდა.
შეხვედრაზე მხარეებმა საქართველოში მიმდინარე პოლიტიკური პროცესებზე ისაუბრეს, ასევე, საქართველოს ნატო-ში ინტეგრაციის პერსპექტივები და საქართველოში ივნისის ბოლოს დაგეგმილი ჩრდილოატლანტიკური საბჭოს ვიზიტის მოსამზადებელი პროცესის მნიშვნელოვანი დეტალები განიხილეს.
„ნატო-ში ინტეგრაცია არის საქართველოს პრიორიტეტი და ჩვენ თანმიმდევრულად ვმუშაობთ შემდეგ სამიტზე მნიშვნელოვანი შედეგის მისაღწევად"- განაცხადა შეხვედრისას ალექსი პეტრიაშვილმა.
მხარეებმა, ასევე, საქართველო-რუსეთის ურთიერთობების ნორმალიზების საკითხზე ისაუბრეს. ამ მიმართულებით სახელმწიფო მინისტრმა ხაზი გაუსვა ჟენევის მოლაპარაკებების, როგორც მხარეებს შორის კონფლიქტის დარეგულირების მთავარ მექანიზმს.
ნატოს გენერალური მდივნის სპეციალური წარმომადგენელი კავკასიასა და ცენტრალურ აზიაში ჯეიმს აპატურაი საქართველოში ნატო-ს კვირეულის ფარგლებში იმყოფება. რიგით მე-6 კვირეული ნატო-სა და ევროკავშირის შესახებ საინფორმაციო ცენტრისა და ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ორგანიზებით იმართება.
