29 მაისს, საქართველოს ფინანსთა მინისტრი ნოდარ ხადური შვეიცარიის კონფედერაციის საგანგებო და სრულუფლებიან ელჩს საქართველოში გუნტერ ბეხლერს შეხვდა. შეხვედრაზე საქართველოს ფინანსთა მინისტრმა სტუმარს გააცნო ქვეყნის ეკონომიკური პრიორიტეტები და აღნიშნული მიმართულებით დაგეგმილი რეფორმები.
შეხვედრაზე ფინანსთა მინისტრმა შვეიცარიულ მხარეს საქართველოში ალტერნატიული მარკო-ეკონომიკური ცენტრის ჩამოყალიბების პროცესში დახმარება სთხოვა, რაზეც შვეიცარიის ელჩმა მზადყოფნა გამოთქვა. შეხვედრაზე ასევე საუბარი შეეხო საქართველოს განვითარების სტრატეგიული გეგმის მომზადების პროცესში საერთაშორისო გამოცდილების გაზიარების მიზნით, შვეიცარიული მხარის დახმარებას.
თავის მხრივ, შვეიცარიის ელჩი ფინანსთა მინისტრთან გამართულ შეხვედრაზე გამოვიდა ინიციატივით საქართველოში გაიმართოს საქართველო-შვეიცარიის ბიზნეს-ფორუმი, რომელზედაც შვეიცარიულ კომპანიებს საშუალება ექნებათ გაეცნონ საქართველოს ახალ საინვესტიციო შესაძლებლობებს და მოიძიონ ქართველი პარტნიორები. ფინანსთა მინისტრმა ელჩს აღნიშნულ პროცესში სრული ჩართულობისა და მხარდაჭერის პირობა აღუთქვა.
შვეიცარიის კონფედერაციის ელჩმა ასევე დაადასტურა საქართველოს მთავრობისა და მისი ეკონომიკური პოლიტიკის მიმართ მხარდაჭერა და იმედი გამოთქვა, რომ ორ ქვეყანას შორის სავაჭრო-ეკონომიკური ურთიერთობები კიდევ უფრო გააქტიურდება.
მასალის გამოყენების პირობები
