პრეზიდენტს კიდევ ერთი უფლება ჩამოერთმევა. პარლამენტში ენერგეტიკისა და ბუნებრივი გაზის შესახებ კანონპროექტი არის შესული, რომლის მიხედვითაც ენერგეტიკისა და წყალმომარაგების მარეგულირებელი ეროვნული კომისიის წევრებს და კომისიის თავმჯდომარის თანამდებობაზე დანიშვნას და გათავისუფლებას პრემიერი განახორციელებს. ცვლილებების მიხედვით კომისიის თავმჯდომარე აღნიშნულ თანამდებობაზე ექვსი წლით დაინიშნება. აღნიშნულ ცვლილებებს ეხმაურებიან საპარლამენტო უმცირესობის წარმომადგენლები, რომელთა განცხადებითაც აღნიშნული კანონპროექტის მიღება ხელისუფლების მიერ კონსტიტუციის საკუთარ თავზე მორგების ნათელი მაგალითი იქნება.
„ის რასაც კოალიცია ქართული ოცნება ამ ხნის განმავლობაში გვედავებოდა, ეს იყო კონსტიტუციის ერთ რომელიმე პარტიაზე მორგება. თუმცა იგივეს აკეთებს პარლამენტში უმრავლესობა. ისინი მიიღებენ კანონპროექტს რომლის მიხედვითაც, პრემიერი უშუალოდ ჩაერევა სემეკის საქმიანობაში. ვფიქრობ რომ სემეკი უნდა იყოს პოლიტიკურად ნეიტრალური და მასზე ზეგავლენის მოხდენა არც ერთ პოლიტიკურ ძალას არ უნდა შეეძლოს" განაცხადა ლევან ბეჟაშვილმა.
ცნობისთვის აღნიშნული საკნონმდებლო ინიციატივის ამოქმედების შემდეგ გარდა კომისიის თავმჯდომარის დანიშვნისა პრემიერს უფლება ექნება კომისიის ერთ-ერთი წევრი თავად დანიშნოს.
