სრულიად საქართვლოს კათოლიკოს-პატრიარქი ილია II დღეს, მღვდელმთავრებთან ერთად, ინტერრელიგიურ სამუშაო ჯგუფში შემავალი რელიგიური გაერთიანებების წამომადგენლებს შეხვდა.
საპატრიარქოს ინფორმაცით, ინტერრელიგიურ სამუშაო ჯგუფში შემავალმა რელიგიური გაერთიანებების წამომადგენლებმა 17 მაისს განვითარებულ მოვლენებთან დაკავშირებით წუხილი გამოთქვეს და ძალადობრივი მოწოდებებისა და ქმედებების გამო უარყოფითი დამოკიდებულება გამოხატეს.
რელიგიური გაერთიანებების წარმომადგენლებმა ერთხმად აღნიშნეს, რომ ერთსქესიანთა ურთიერთობა უმძიმესი ცოდვაა და მისი პროპაგანდა, ტირაჟირება და პოპულარიზაცია ყოვლად მიუღებელია.
სრულიად საქართველოს კათოლიკოს-პატრიარქი და დამსწრე რელიგიური დენომინაციების ლიდერები შეთანხმდნენ, დაიწყონ აქტიური მუშაობა, რათა თავის მხრივ ხელი შეუწყონ საზოგადოებაში არსებული ამ და სხვა პრობლემების მოგვარებას. დაიგეგმა კონკრეტული ერთობლივი ღონისძიებებიც.
კერძოდ, მოხდეს ზნეობრივ თემებზე ერთობლივი წიგნის (ან წიგნების) პუბლიკაცია; ყველამ შეუწყოს ხელი ოჯახის, როგორც სახელმწიფოს უმრთავრესი საყრდენის, სიწმინდისათვის ზრუნვის გაძლიერებას; ეთხოვოს სახელმწიფოს ოჯახის დღის დაწესება-აღნიშვნა; მოხდეს ზოგადად საგანმანათლებლო საქმიანობის გააქტიურება და საკანონმდებლო ორგანოსათვის განსახილველად შემუშავდეს გარკვეული წინადადებები, რომელიც მოზარდების მავნე ზემოქმედებისაგან დაცვას ხელს შეუწყობს.
შეხვედრას ესწრებოდნენ ლიდერები შემდეგი რელიგიური დენომინაციებიდან: "იუდეური თემი", "სომეხთა სამოციქულო მართლმადიდებელი წმინდა ეკლესიის საქართველოს ეპარქია", "ამიერკავკასიის კათოლიკეთა სამოციქულო ადმინისტრაცია", "ევანგელურ-ლუთერული ეკლესია", "ევანგელურ-ბაპტისტური ეკლესია", "იეზიდთა თემი", "სახარების რწმენის ეკლესია", "მეშვიდე დღის ქრისტიან ადვენტისთა ეკლესია", ასევე ინტერრელიგიური სამუშაო ჯგუფის კოორდინატორი პაატა გაჩეჩილაძე და კონფესიათაშორისი დიალოგისა და საერთაშორისო ორგანიზაციებთან ურთიერთობებში საქართველოს საპატრიარქოს წარმომადგენელი თეა გოგოტიშვილი.
