ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი ალექსი პეტრიაშვილი სამუშაო ვიზიტით პორტუგალიის რესპუბლიკაში იმყოფება. ვიზიტის ფარგლებში დაგეგმილია მაღალი დონის შეხვედრები პორტუგალიის თავდაცვის სახელმწიფო მდივან ბერტა კაბრალთან, ასევე, საგარეო ურთიერთობებისა და თავდაცვის საპარლამენტო კომიტეტების თავმჯდომარეებთან.
ალექსი პეტრიაშვილი სამუშაო ვიზიტის ფარგლებში უკვე შეხვდა ევროპის საქმეთა სახელმწიფო მდივანს მიგელ მორაიშ ლეიტაოსა და პორტუგალიის ნატო-ს საპარლამენტო დელეგაციის ხელმძღვანელს კორეია დე ჟესუშს. შეხვედრებზე მხარებმა საქართველო-პორტუგალიას შორის ორმხრივი პოლიტიკური, ეკონომიკური და კულტურული თანამშრომლობის გაღრმავების საკითხები განიხილეს. ასევე, საქართველოში მიმდინარე პოლიტიკურ პროცესებსა და ქვეყნის საგარეო-პოლიტიკურ პრიორიტეტებზე ისაუბრეს.
პორტუგალიაში სამუშაო ვიზიტის ფარგლებში ალექსი პეტრიაშვილი სიტყვით გამოვიდა პორტუგალიის საერთაშორისო ურთიერთობებისა და უსაფრთხოების ინსტიტუტის( IPRIS) მიერ ორგანიზებულ კონფერენციაზე. ლისაბონის უნივერსიტეტში გამართულ ღონისძიებას სახელწოდებით-„გამოწვევები და პერსპექტივები: საქართველო 2012 წლის არჩევნების შემდეგ", დიპლომატები, ადგილობრივი არასამთავრობო ორგანიზაციების, კვლევითი ცენტრების წარმომადგენლები და სტუდენტები ესწრებოდნენ.
