"ხელისუფლება თავიანთი წარუმატებლობის გადაფარვას ხმაურიანი დაჭერებით ცდილობს ეს კი ჩვენი საზოგადოების ყურადღებას ერთ დღეზე მეტხანს ვერ მიიპყრობს", _ აცხადებს საპარლამენტო უმცირესობის ერთ ერთი ლიდერი ნუგზარ წიკლაური სააგენტო "ჯი-ეიჩ-ენთან" პარტია "ნაციონალური მოძრაობის" გენერალური მდივნის ვანო მერაბიშვილის დაკავების კომენტირებისას.
"ჩვენ ვხედავთ, რომ ხელისუფლებას გადაფარვა სურთ იმ წარუმატებლობების, იმ პირდაპირი ტყუილის, რომლითაც ასაზრდოვა აქამდე ქართული საზოგადოება, ამ ტყუილების გადაფარვა სურთ ხმაურიანი დაჭერებით. რაც ძალიან მდარე და ძალიან პრიმიტიული ხერხია და არ მგონია, რომ ამან ერთ დღეზე მეტი ხნით მიიპყროს ჩვენი საზოგადოების ყურადღება", _ აცხადებს წიკლაური.
მისივე თქმით, ჩვენს საზოგადოებას აინტერესებს ის, რასაც დაპირდნენ მას წინასაარჩევნო კამპანიის დროს და რაც არ სრულდება.
"საერთოდ ცინიკური არის როდესაც აკავებენ ბატონ ჭიაბერაშვილს და ბატონ მერაბიშვილს ადამიანების დასაქმებისათვის და აკავებს ის ხელისუფლება, რომელმაც ყველაფერი გააკეთა, რომ ამ შვიდი თვის განმავლობაში 80 ათასი ადამიანით შემცირებულიყო იმ ადამიანთა რიცხვი, რომლებსაც ჰქონდათ სამუშაო. ეს არის მართლაც ცინიკური და ამის გადაფარვა ვერანაირი ამ ტიპის დაჭერებით ვერ მოხდება. ეს არის პოლიტიკური დაჭერა, პოლიტიკური დევნა მთავარი ოპოზიციური პოლიტიკური ძალის წინააღმდეგ და ჩვენი გატეხვის მცდელობა", _ აცხადებს წიკლაური "ჯი-ეიჩ-ენთან" საუბარში.
მასალის გამოყენების პირობები
