საქართველოს საგარეო საქმეთა მინისტრი ოფიციალური ვიზიტით იაპონიაში იმყოფება. მაია ფანჯიკიძემ შეხვედრა გამართა იაპონიის საგარეო საქმეთა მინისტრთან ფუმიო კიშიდასთან. შეხვედრაზე მინისტრებმა იაპონია-საქართველოს ურთიერთობები განიხილეს და სამომავლო თანამშრომლობის გეგმები დასახეს. იაპონიის საგარეო საქმეთა მინისტრმა კიდევ ერთხელ დააფიქსირა იაპონიის მხარდაჭერა საქართველოს ტერიტორიული მთლიანობის მიმართ.
„მინისტრთან შეხვედრის ფარგლებში ხელი მოვაწერეთ სამინისტროებს შორის თანამშრომლობის მემორანდუმს. იაპონიასთან პოლიტიკური კონსულტაციები რეგულარული ხასიათისაა და შემდეგი რაუნდი გაიმართება საქართველოში, მიმდინარე წლის დეკემბერში. ვისაუბრეთ ორმხრივ ურთიერთობებზე. იაპონიის საგარეო საქმეთა მინისტრმა კიდევ ერთხელ დაადასტურა საქართველოს ტერიტორიული მთლიანობის და სუვერენიტეტის მხარდაჭერა. ვისაუბრეთ იმის თაობაზე, რომ ორ ქვეყანას შორის ურთიერთობები ყველა მიმართულებით გავაძლიეროთ" - განაცხადა შეხვედრის დასრულების შემდეგ მაია ფანჯიკიძემ.
დღესვე საქართველოს საგარეო საქმეთა მინისტრი იაპონიაში აკრედიტებული ოკეანეთის ქვეყნების ელჩებს შეხვდა, სადაც ოკეანეთის ქვეყნების საქართველოსთან ურთიერთობების საკითხები განიხილა.
ვიზიტის ფარგლებში მაია ფანჯიკიძემ კომპანია „Panasonic"-ის ინოვაციების ცენტრიც მოინახულა. განიხილება საქართველოში სვადასხვა პროექტებში კომპანიის შემდგომი ჩართულობა.
მასალის გამოყენების პირობები