ვანუატუსა და საქართველოს შორის დიპლომატიური ურთიერთობები დამყარდება. როგორც საგარეო საქმეთა მინისტრის მოადგილემ დავით ჯალაღანიამ განაცხადა, ქართულ მხარეს სურდა, ვანუატუს მიერ აფხაზეთის აღიარების უკანწაღება დიპლომატიური ურთიერთობის დამყარების შემდეგ საზეიმოდ განეცხადებინა.
„მიმდინარე კვირების განმავლობაში ველოდებით ფორმალიზაციას აღნიშნული შეთანხმებისა, რომელიც, სავარაუდოდ, ჩვენი მისიების დონეზე უნდა მოხდეს ნიუ-იორკში, როგორც ეს ჩვეულებრივად ხდება ხოლმე. თქვენ იცით, რომ გასულ წელს რამდენიმე ათეულ ქვეყანასთან დაამყარა საქართველომ დიპლომატიური ურთიერთობა და ეს ჩვეულებრივი პროცესია. თუმცა, ვანუატუს შემთხვევაში, შეიძლება, ვისაუბროთ საქართველოს საერთო წარმატებაზე. აქვე, მინდა, აღვნიშნო, ჩვენი პარტნიორი ქვეყნების როლი, რომლებიც ძალზედ დიდ მხარდაჭერას გვიცხადებენ საერთაშორისო არენაზე, იმ ქვეყნების მისამართით, რომელთანაც დიალოგში ხაზგასმით აღნიშნავენ საერთაშორისო სამართლის და საერთაშორისო პრინციპების განუხრელი დაცვის აუცილებლობას. ამდენად, ეს ფაქტი ნამდვილად სასიხარულო და მისასალმებელია, თუმცა, თუ ვიქნებით ძალიან პედანტები დიპლომატიური და იურიდიული თვალსაზრისით, მე ვისურვებდი, რომ ამაზე ჩვენ უფრო ხმამაღლა და საზეიმოდ გაგვეცხადებინა უშუალოდ დიპლომატიური ურთიერთობების დამყარების ოქმის ხელმოწერის შემდეგ", - განაცხადა დავით ჯალაღანიამ.
მასალის გამოყენების პირობები
