ნატო-ს საპარლამენტო ასამბლეა ქართულ პარტიებს კოჰაბიტაციის გაძლიერებისკენ და დაძაბული ურთიერთობების დალაგებისკენ მოუწოდებს, რადგან საქართველო ისევ ისწრაფვის ნატო-სა და ევროკავშირში გაწევრიანებისკენ, - ამის შესახებ საუბარია ნატო-ს საპარლამენტო ასამბლეის ოფიციალურ ვებგვერდზე გავრცელებულ განცხადებაში.
"დროა, ქვეყანაში ნორმალური დემოკრატიული პროცესები დაიწყოს. უნდა იკლოს ხისტმა რიტორიკამ და ურთიერთბრალდებებმა", - განაცხადა იტალიელმა სენატორმა ლუჩიო მალანმა ლუქსემბურგში, ნატო-ს საპარლამენტო ასამბლეის საგაზაფხულო სესიაზე. მისივე თქმით, წინა ხელისუფლების მმართველობისას დაშვებული ხარვეზები უნდა გამოსწორდეს, თუმცა ეს არ უნდა გადაიზარდოს პოლიტიკურ რევანშში.
ნატო-ს ლიდერებმა აიღეს პასუხისმგებლობა, რომ ერთ დღეს საქართველო ალიანსის წევრი გახდება და ოქტომბერში, ხელისუფლებაში მოსული ახალი მთავრობა ალიანსში გაწევრიანების ერთგული რჩება. მან ასევე აღნიშნა, რომ ავღანეთში, ნატო-ს მისიაში საქართველოს დიდი წვლილი შეაქვს.
იტალიელმა სენატორმა ასევე განაცხადა, რომ ნატო-ს მომავალ სამიტზე ალიანსის წევრებმა სერიოზულად უნდა განიხილონ საქართველოსთვის ნატო-ში გაწევრიანების სამოქმედო გეგმის მიცემა. თუმცა, თავის გამოსვლაში მან შეშფოთება გამოთქვა საქართველოში ბოლო ხანს განვითარებული პოლიტიკური დაძაბულობით.
"ნატო-სა და ევროკავშირის წევრობა საქართველოსთვის აუხდენელი ოცნება გახდება, თუ ქვეყანაში შიდა პოლიტიკური კონფლიქტი იარსებებს და საქართველო ვერ შეძლებს ჭეშმარიტი დემოკრატიის გზით სვლას", - განუცხადა ლუჩიო მალანმა ასამბლეის პარლამენტარებს, რომელთა შორის საქართველოს წარმომადგენლებიც იმყოფებოდნენ.