საქართველოში არსებული კონფლიქტები ევროსაბჭოს განსაკუთრებული ყურადღების ქვეშ არის მუდმივად. ეს განცხადება ევროსაბჭოს გენერალურმა მდივანმა ტურბერნ იაგლანდმა საქართველოს საგარეო საქმეთა მინისტრთან მაია ფანჯიკიძესთან შეხვედრისას გააკეთა.
"ევროსაბჭო აღიარებს საქართველოს ტერიტორიულ მთლიანობას და ეს არის საფუძველი ჩვენი ამ ქვეყანასთან ურთიერთობისა. ჩვენ გავაგრძელებთ წელიწადში ორჯერ კონსოლიდირებული ანგარიშების გაკეთებას და ასეთი ერთ-ერთი ანგარიში უახლოეს მომავალში იქნება წარმოდგენილი", _ განაცხადა იაგლანდმა.
მანვე კმაყოფილება გამოხატა ქართული მხარის მიერ ჩატარებული სამუშაოს გამო და აღნიშნა, რომ "გამუდმებით უნდა იყოს მიღებული კონსტრუქციული ზომები ჯენევის პროცესის მხარდაჭერისათვის".
შეეხო რა ევროსაბჭოსა და საქართველოს ურთიერთობებს, იაგლანდმა ასევე აღნიშნა, რომ ურთიერთობა გაუმჯობესდა ხელისუფლებაში ბიძინა ივანიშვილის მთავრობის მოსვლის შემდეგ.
"მე უკვე არაერთხელ მქონდა შეხვედრები საქართველოს სახელმწიფოს პირველ პირებთან. წარმატებული იყო ასევე პრემიერ-მინისტრის ბიძინა ივანიშვილის სიტყვით გამოსვლა ევროსაბჭოში. ასევე წარმატებული იყო შეხვედრა იუსტიციის მინისტრთან თეა წულუკიანთან, რომელმაც მე ის მნიშვნელოვანი რეფორმები გამაცნო, რომლებიც ახლა საქართველოში ტარდება. დღეს კი ძალიან ნაყოფიერი შეხვედრა გაიმართა საქართველოს საგარეო საქმეთა მინისტრთან", _ განაცხადა ევროსაბჭოს
გენერალურმა მდივანმა.
თავის მხრივ საქართველოს საგარეო საქმეთა მინისტრმა აღნიშნა, რომ შეხვედრაზე საქართველოსა და ევროსაბჭოს ორმხრივი ურთიერთობების საკითხები განიხილეს. "ჩვენ განვიხილეთ ევროსაბჭოსგან მიღებული სამოქმედო გეგმები, რომლებიც გაწერილია არა ერთ წლით, როგორც ადრე, არამედ სამი წლით. ასევე განვიხილეთ ერთობლივი პროექტები რამდენიმე მიმართულებით - ადამიანის უფლებების დაცვის, დემოკრატიული ინსტიტუტების გაძლიერების, კანონის უზენაესობის გამყარებისა და კონფლიქტების დარეგულირების კუთხით.
მასალის გამოყენების პირობები