"ჩვენი ურთიერთობები საქართველოსთან გაუმჯობესდა ახალი ხელისუფლების მოსვლის შემდეგ", - განაცხადა მაია ფანჯიკიძესთან შეხვედრისას ევროსაბჭოს გენერალურმა მდივანმა ტორბიორნ იაგლანდმა. "მე უკვე არაერთი შეხვედრა მქონდა საქართველოს ახალი ხელისუფლების წარმომადგენლებთან. სტრასბურგში განხორციელდა საქართველოს პრემიერ-მინისტრის ძალიან წარმატებული ვიზიტი. მე ასევე შევხვდი საქართველოს იუსტიციის მინისტრს, რომელმაც ქვეყანაში მიმდინარე მნიშვნელოვანი რეფორმები გამაცნო. დღეს კი, შეხვედრა გავმართე საქართველოს საგარეო საქმეთა მინისტრთან. ეს იყო ძალიან კონსტრუქციული შეხვედრა", - აღნიშნა მან.
საქართველოს საგარეო საქმეთა მინისტრის განცხადებით, შეხვედრაზე ისაუბრეს საქართველოსა და ევროსაბჭოს შორის ბოლო დროს განვითარებულ კონსტრუქციულ თანამშრომლობაზე.
"შეხვედრაზე ვისაუბრეთ იმის თაობაზე, რომ მივიღებთ ევროპის საბჭოსგან სამოქმედო გეგმას, რომელიც იქნება სამ წელიწადზე და რომელიც საქართველოს საშუალებას მისცემს განახორციელოს ერთობლივი პროექტები რამდენიმე მიმართულებით. ეს მიმართულებებია ადამიანის უფლებების დაცვა, დემოკრატიული ინსტიტუტების გაძლიერება, კანონის უზენაესობა და აგრეთვე კონფლიქტის მოგვარების საკითხშიც იქნება ერთობლივი პროექტები. საქართველოს პარლამენტში უკვე გადაგზავნილია რატიფიცირებისთვის ევროპის საბჭოს ოფისის საკითხი, რომელიც ბოლო პერიოდის განმავლობაში იყო პრობლემა. ყოველივე ეს არის მაჩვენებელი იმისა, რომ ჩვენი თანამშრომლობა არის ძალიან კონსტრუქციული და დარწმუნებული ვარ, რომ ეს თანამშრომლობა ძალიან ბევრ დადებითს მოუტანს ჩვენს ქვეყანას" - განაცხადა მაია ფანჯიკიძემ.
დღესვე სტრასბურგში ხელი მოეწერა ევროპის საბჭოს კონვენციის დამატებით ოქმს "პერსონალური მონაცემების ავტომატური დამუშავებისას ფიზიკური პირების დაცვის შესახებ".
მასალის გამოყენების პირობები