,,საქართველოს ბათუმის ტექნოლოგიური უნივერსიტეტი ჰაერივით სჭირდება", -განაცხადა მიხეილ სააკაშვილმა ბათუმში სტუმრობისას სადაც ტექნოლოგიური უნივერსიტეტი მოინახულა და აღნიშნა, რომ ახლა მისი საწინააღმდეგო ქმედებების დრო არ არის.
"საქართველოს ასეთი სასწავლებელი ჰაერივით სჭირდება. დღეს ჩვენ ვართ კონკურენციაში თანამედროვე ტექნოლოგიებთან. როცა შევქმენით ჩვენი სამხედრო ტექნიკა - "ლაზიკა" და "დიდგორი" და უპილოტო საფრენი აპარატები, სწორედ მაშინ გაგვიჩნდა აზრი, რომ გვჭირდება სახლში გაზრდილი მსოფლიო კლასის ინჟინრები, რადგან ქართველებს თუ მხოლოდ უცხოეთში გავუშვებთ სასწავლებლად, მათგან საუკეთესოებს იქაური უნივერსიტეტი ან ფირმა დაიტოვებს. ჩვენ გვჭირდება, რომ ხალხი აქ იყოს და აქ სწავლობდეს. ამიტომ გაჩნდა აზრი, რომ ეს უნივერსიტეტი გვჭირდება. ჩვენ ავაშენეთ მსოფლიო არქიტექტურული შედევრი, ყველაზე საამაყო შენობა საქართველოში და ყველაზე მაღალი შენობა კავკასიაში, როგორც სიმბოლო იმისა, რომ ყველაზე კარგს ვაძლევთ განათლებას და ყველა რესურსს ვდებთ განათლებაში", - განაცხადა სააკაშვილმა და პრემიერ-მინისტრს მოუწოდა გადახედოს თავის გადაწყვეტილებას ბათუმის ტექნოლოგიურ უნივერსიტეტთან დაკავშირებით.
,,თუ ის არ გადახედავს, ადრე თუ გვიან მაინც გადავხედავთ, მაინც გავუშვებთ მერიას აქედან და მაინც დავაბრუნებთ აქ უნივერსიტეტს, მაგრამ ამაში დროს დავკარგავთ. ახლა ჯიბრის, ჯინის და სააკაშვილის საწინააღმდეგო ქმედებების დრო არ არის. დაივიწყეთ, რომ ვარსებობ, მაგრამ გაიხსენეთ, რომ საქართველოს სჭირდება განათლებული თაობა, განვითარება და ხვალინდელი დღე. ამ უნივერსიტეტს გადარჩენა სჭირდება და ამ ქალაქისთვის და ჩვენი ქვეყნისთვის ეს სასიცოცხლოდ მნიშვნელოვანია. პრაქტიკულად ყველაფერი, რაც მოვაწყვეთ - ლაბორატორიები, ტექნიკა, ავეჯი, ყველაფერი ჩამოუგლეჯიათ, ჩამოუფხრეწიათ, გაუტანიათ და სადღაც წაუღიათ. შევარდნენ, როგორც დამპყრობლები და წაიღეს ყველაფერი, რაც უნივერსიტეტისთვის იყო გამზადებული. არ ვიცი ამას რა ჰქვია და როგორ შეიძლება XXI საუკუნეში არათუ ხელისუფალი, არამედ ნებისმიერი ადამიანი ამას აკეთებდეს", - განაცხადა მიხეილ სააკაშვილმა.