საქართველოს პრეზიდენტი გურჯაანში ათი წლის ბავშვის გაუპატიურების ფაქტს ეხმაურება. როგორც მიხეილ სააკაშვილმა ფოთის საკათედრო ტაძრის კურთხევის შემდეგ ჟურნალისტებთან საუბრისას განაცხადა, კრიმინალის მიზეზი გახდა ის, რომ ამნისტიის შედეგად ციხე ბევრმა პედოფილმა დატოვა.
,,გურჯაანში მოხდა ამაზრზენი ფაქტი. როცა ვეტო დავადე ამნისტიის კანონს, მათ შორის ვეტო დავადე იმ მოტივით, რომ პედოფილები არ გამოსულიყვნენ გარეთ. მინდა ყველას შევახსენო, რომ განსაკუთრებით გავაფრთხილე პარლამენტი პედოფილებზე, თუმცა მთელი პარლამენტი პრემიერის მითითებით დაირაზმა და გადალახა ჩემი ვეტო და პედოფილმა გააუპატიურა ათი წლის ბავშვი, ამ ამნისტიის შედეგად გამოშვებულმა დამნაშავემ", - განაცხადა მიხეილ სააკაშვილმა.
შეგახსენებთ, რომ გურჯაანში 45 წლის ამნისტირებულმა პატიმარმა 10 წლის ბავშვი გააუპატიურა. მომხდართან დაკავშირებით მიმდინარეობს გამოძიება.