ბიძინა ივანიშვილი, შრომის კოდექსთან დაკავშირებით, გიორგი მარგველაშვილის პოზიციას იზიარებს. ამის შესახებ პრემიერ-მინისტრმა აჭარის უმაღლესი საბჭოს წევრებთან შეხვედრის შემდეგ ჟურნალისტებთან განაცხადა.
,,მარგველაშვილის განცხადებას მე ვიზიარებ თავიდან ბოლომდე. შრომის კოდექსის შემოღებაზე ინიციატორები ვიყავით ძალიან ბევრნი და ერთ-ერთი მეც გახლდით. ის, რაც არსებობდა წინა ხელისუფლების პირობებში, იყო საშინელება. დაქირავებულს პრაქტიკულად არავითარი უფლებები არ გააჩნდა. მეორე მხარეს ვიცით ყოველთვის გადახრა, როცა რაიმე არ გვაქვს და მერე საშუალება გვაქვს. მგონი, ეს მოხდა პირველი მოსმენის შემთხვევაში განხილულ კანონპროექტთან დაკავშირებით, რომ გადაჭარბებულად მეტი უფლებები მისცეს. მეტი უფლებები არ არსებობს დაქირავებულზე, პრინციპში ნორმალურია, ნებისმიერი უფლება დაქირავებულს შეიძლება მივცეთ, მაგრამ ჩვენ რეალობა არ უნდა დავკარგოთ და არ უნდა დაგვავიწყდეს, რომ ყველაზე დიდი უსამართლობა, რაც სუფევს საქართველოში არის ის, რომ საქართველოში მოსახლეობას არ შეუძლია სამუშაო ადგილების შოვნა. ტოტალური უმუშევრობა არის ყველაზე დიდი უსამართლობა და ყველაზე დიდი პრობლემა საქართველოში", _განაცხადა ივანიშვილმა და აღნიშნა, რომ საქართველოს შრომის კოდექსი ევროპული სტანდარტების შესაფერისი იქნება.
შეგახსენებთ, რომ გიორგი მარგველაშვილის განაცხადებით, პარლამენტში როზა ლუქსემბურგის ოცნების შრომის კოდექსია შესული. "პარლამენტში ისეთი შრომის კოდექსია შესული, ვერავინ ვეღარ გაინძრევა. როზა ლუქსემბურგის ოცნების შრომის კოდექსია შესული, როზა ლუქსემბურგის ოცნებას თუ ვახდენდით, არ ვიცოდი. შიგნით ისეთები წერია, საერთოდ დამსაქმებელი ვეღარ გაჭაჭანდება საქართველოში, ვერც სახელმწიფო და ვერც ბიზნესი. ეს ძალიან პრობლემურია, მით უმეტეს, ქვეყანაში, სადაც ბიზნესი უნდა განვითარდეს, სადაც ხელისუფლებამ რეფორმები უნდა გაატაროს. ამ შრომის კოდექსის შეტანა იყო აბსოლუტურად არასწორი. ამ ფონზე, ესენი პოლიციას ურტყამენ", - განაცხადა გიორგი მარგველაშვილმა და აღნიშნა, რომ ახალი შრომის კოდექსი პროფკავშირების დიქტატის საფუძველზე დაიწერა.
