ბოსტონში მომხდარი ორმაგი ტერაქტის შედეგად, დაახლოებით 115 ადამიანი დაზარალდა. ამის შესახებ 911 თავის „ტვიტერზე", ადგილობრივი საავადმყოფოების ინფორმაციებზე დაყრდნობით იუწყება. დაღუპულია ორი ადამიანი, მათ შორის 8 წლის ბავშვი. ამ ინფორმაციას ბოსტონის პოლიციაც ადასტურებს.
ბოსტონში ორი აფეთქება ადგილობრივი დროით 14-50 წუთზე, პრესტიჟული ყოველწლიური მარათონის დროს მოხდა, მაშინ როცა მონაწილეების უმრავლესობამ ფინიშს მიაღწია. სპორტული ღონისძიების სანახავად, რამდენიმე ასეული ათასი ადამიანი იყო შეკრებილი. ინფორმაცია მესამე აფეთქების შესახებ, რომელიც ბოსტონის კენედის ბიბლიოთეკასთან მოხდა, არ დადასტურდა.
აშშ-ის პრეზიდენტმა ბარაკ ობამამ უკვე გააკეთა განცხადება და აღნიშნა, რომ მისთვის ამ ეტაპზე უცნობია ტერაქტის ორგანიზატორების ვინაობა და მათი მოტივები, თუმცა, დამნაშავეებს აუცილებლად იპოვიან და კანონის შესაბამისად, საკადრისად დასჯიან.
