„ქვეყანამ, საზოგადოებამ და საერთაშორისო თანამეგობრობამ იცოდეს სიმართლე. სიმართლემ არ შეიძლება ქვეყანა დააზარალოს, სიმართლე აგვისტოს ომთან დაკავშირებით დააზარალებს მიხეილ სააკაშვილს და მის უპასუხისმგებლო გუნდს, რომლებმაც ჩემი არაერთგზის გაფრთხილების მიუხედავად ქვეყანა დააქციეს და დაღუპეს. სიმართლე არათუ არ დააზარალებს საქართველოს, არამედ სიმართლე ჩვენ მოგვცემს შანსს ღიად ველაპარაკოთ აფხაზებს და ოსებს და დავიწყოთ ჩატეხილი ხიდების აღდგენა"-განაცხადა ბრიტანეთის საელჩოსთან 2008 წლის აგვისტოს ომის გამოძიებასთან დაკავშირებით ჟურნალისტების მიერ დასმულ შეკითხვაზე ნინო ბურჯანაძემ, რომელიც დღეს პარტიის მთავარი საბჭოს წევრებთან ერთად, მარგარეტ ტეტჩერის გარდაცვალებასთან დაკავშირებით საელჩოში სამძიმრის გამოსახატად მივიდა.
ნინო ბურჯანაძის განცხადებით, ის მზად არის ყველა საკითხთან დაკავშირებით, რაზეც მას ინფორმაცია გააჩნია, ითანამშრომლოს გამოძიებასთან.
„ჩემ დროს ომი არ ყოფილა, იმიტომ რომ მე ვარ პოლიტიკოსი, მე მქონდა პასუხისმგებლობა აღებული საკუთარი სამშობლოსა და საკუთარი ქვეყნის წინაშე და განსხვავებით ნაციონალური მოძრაობის ლიდერებისგან და სააკაშვილისგან მიმაჩნია, რომ ყველამ უნდა ითანამშრომლოს გამოძიებასთან. თუ არაფერი გაქვს დასამალი - არც არაფრის არ გეშინია, რისი ეშინია „ნაციონალურ მოძრაობას" თუ თვლის რომ მართალია?"-განაცხადა ნინო ბურჯანაძემ.