"ოკუპირებული ტერიტორიების შესახებ" კანონპროექტში შესატანი ცვლილებების განხილვა შემდეგი კვირისთვის გადაიდო.
დეპუტატებს ამ საკითხზე რამდენიმე წუთში პლენარულ სხდომაზე უნდა ემსჯელათ.
უმრავლესობის წევრების განცხადებით, გადაწყვეტილების ერთ-ერთი მთავარი მიზეზი დღეს დღის წესრიგში ისეთი საკითხების არსებობაა, რომლებიც დაჩქარებული წესით განხილვას მოითხოვს.
აღნიშნული გადაწყვეტილება მისაღები აღმოჩნდა უმცირესობის წევრებისთვის.
ისინი აცხადებენ, რომ იმ შემთხვევაში, თუ უმრავლესობა მათთან დამატებით კონსულტაციებს მოისურვებს, ისინი მზად არიან ამისთვის და იმედს გამოთქვამენ, რომ მათი რეკომენდაციები და შენიშვნები გათვალისწინებული იქნება.
"ოკუპირებული ტერიტორიების შესახებ" კანონში შესატანი ცვლილებების თანახმად, თუ ოკუპირებული ტერიტორიებიდან უცხო ქვეყნის მოქალაქე საქართველოს საზღვარს გადმოკვეთს, მას პირველ ჯერზე ადმინისტრაციული სასჯელი - ჯარიმა 400 ლარის ოდენობით დაეკისრება. განმეორებით შემთხვევაში კი, მის მიმართ უკვე სისხლის სამართლის პასუხისმგებლობის საკითხი დადგება.
