ექსპერტი რამაზ საყვარელიძე მიიჩნევს, რომ ხელისუფლებისგან 6 თვეში ბევრი რამის გაკეთება არ შეიძლება, მაგრამ ამდენი კითხვების დაგროვებაც არ შეიძლება. როგორც მან "პრაიმ-ტაიმის" პრესკლუბში აღნიშნა, ძალოვანი სტრუქტურების ინტერესებში არ არის, რომ მათი წარსული ცოდვა ამოტივტივდეს.
"მონოპოლიების საწინააღმდეგო კანონი 6 თვეში შეიძლებოდა მიღებულიყო? ძნელია, მაგრამ შეიძლება. კანონი ხომ შეიძლება მიიღო, რომელიც გააიოლებს ამ ბრძოლას?! ერთმა კაცმა - ომბუდსმენმა დააყენა ლაფანყურის პრობლემა, წარმოაჩინა თავის ანგარიშში და თქვა, რომ გამოსაძიებელია", - განაცხადა საყვარელიძემ.
მისი თქმით, სახალხო დამცველმა ლაფანყურთან დაკავშირებით მასალები პროკურატურაში კი არ წაიღო, არამედ პარლამენტს დროებითი საგამოძიებო კომისიის შექმნა მოსთხოვა.
"ბევრი რამ, რაც შეიძლებოდა უფრო ეფექტურად განხორციელებულიყო, არ განხორციელდა. პიარი, არჩევნებამდე ხომ კეთდებოდა, ახლა რატომ გაჩერდა "ქართული ოცნება", მაშინ, როცა "ნაციონალურმა მოძრაობამ" თქვა, რომ ბრძოლა ახლა იწყება", - აღნიშნა საყვარელიძემ.
მისი თქმით, სადაც შეცდომის დაშვება აუცილებელი არ იყო, სწორედ იქ იყო დაშვებული.