საქართველოს პრეზიდენტის მიერ რამდენიმე ქვეყანაში საქართველოს საგანგებო და სრულუფლებიანი ელჩების წარდგინების საკითხზე იმსჯელეს დღეს სამი კომიტეტის გაერთიანებულ სხდომაზე.
საგარეო საქმეთა მინისტრის მოადგილის გიორგი ხელაიას ინფორმაციით, ლიტვის რესპუბლიკაში საქართველოს საგანგებო და სრულუფლებიან ელჩად წარდგენილია ხათუნა სალუქვაძის, თურქეთის რესპუბლიკაში საქართველოს საგანგებო და სრულუფლებიან ელჩად - ირაკლი კოპლატაძის, ევროპის საბჭოსთან საქართველოს მუდმივ წარმომადგენლად - კონსტანტინე კორკელიას, აზერბაიჯანის რესპუბლიკაში საქართველოს საგანგებო და სრულუფლებიან ელჩად - თეიმურაზ შარაშენიძის და ყაზახეთის რესპუბლიკაში საქართველოს საგანგებო და სრულუფლებიან ელჩად ზურაბ პატარიძის კანდიდატურები.
ელჩობის თითოეულმა კანდიდატმა კანონმდებლებს თავიანთი ხედვები გააცნეს მომავალი საქმიანობის თაობაზე და იმედი გამოთქვეს, რომ პარლამენტთან მჭიდრო თანამშრომლობის პირობებში აღნიშნულ ქვეყნებთან და ევროსაბჭოსთან კონტაქტები კიდევ უფრო გაღრმავდება და მრავალწახნაგოვანი გახდება.
სამივე კომიტეტის წევრებმა დიდი უმრავლესობით მხარი დაუჭირეს წარმოდგენილ კანდიდატურებს.