"ნაციონალური მოძრაობის" ერთ-ერთი ლიდერი მიხეილ მაჭავარიანი "საერთო სასამართლოების შესახებ" კანონპროექტთან დაკავშირებით ვენეციის კომისიის რეკომენდაციების გათვალისწინებას ითხოვს.
როგორც მან დღეს "პირველი რადიოს" რადიოკლუბში აღნიშნა, "ნაციონალური მოძრაობა" ითხოვს, რომ იუსტიციის საბჭოს მოქმედ წევრებს უფლებამოსილება არ შეუწყდეთ.
მისი თქმით, ისეთი განცდა აქვს, რომ ეს კანონი, არა მარტო აქ, არამედ საქართველოს ფარგლებს გარეთ ჩაითვლება, როგორც ძალიან დიდი ჩარევა და ზეწოლა სასამართლო ხელისუფლებაში.
"ა) - არ შეუწყდეს უფებამოსილება იუსტიციის საბჭოს; ბ) - თვითონ იუსტიციის საბჭოს ფორმირების დროს ექვსივე წევრის გასვლადობა იყოს გარანტირებული, მათ შორის ორი წევრის, რომელიც იქნება წარდგენილი", - განაცხადა მაჭავარიანმა.
"საერთო სასამართლოების შესახებ" კანონპროექტს დეპუტატებმა კენჭი 3 აპრილს უნდა უყარონ. კანონპროექტთან დაკავშირებით, კონსულტაციები საპარლამენტო უმრავლესობასა და უმცირესობას შორის უკვე რამდენჯერმე გაიმართა.
