,,ნაციონალური მოძრაობისთვის" მიუღებელია ცვლილებების ის ნაწილი, რომელიც მოსამართლეთა მიერ არჩეული მოსამართლეების შეცვლას ეხება. ამის შესახებ ჟურნალისტებთან საპარლამენტო უმცირესობის ლიდერმა დავით ბაქრაძემ ,,საერთო სასამართლოების შესახებ" ' კანონპროექტთან დაკავშირებით საპარლამენტო უმრავლესობის პოზიციის კომენტირებისას განაცხადა.
" სრულიად მიუღებელია ცვლილებები იმ ნაწილში, რომელიც მოსამართლეთა მიერ არჩეული მოსამართლეების შეცვლას ეხება, რადგან ვინც არ უნდა იყოს საპარლამენტო უმრავლესობაში, მოსამართლეთა კონფერენციის გადაწყვეტილებას პატივი უნდა სცეს. არ შეიძლება მათი შეცვლა და ეს არის ძირითადი უთანხმოების საკითხი. რაც შეეხება საბჭოს მეორე ნაწილს, სადაც პრეზიდენტისა და პარლამენტის მხრიდან დასახელებული წევრები შედიან, აქ მზად ვართ შემხვედრი ნაბიჯი გადავდგათ და სხვადასხვა მექანიზმებზე ვისაუბროთ, მათ შორის განვიხილოთ უმრავლესობის მიერ შეთავაზებული მექანიზმი, მაგრამ ეს არის მცირე ნაწილი იმ შეუსაბამობის მოსაგვარებლად, რაც უმრავლესობის წინადადებებსა და ვენეციის კომისიის რეკომენდაციებს შორის არსებს", -განაცხადა ბაქრაძემ.
